Oratorio - The Beautiful Maiden of Shunnem
Oratorio
Fl-okkażjoni tal-Ġublew Karmelitan 2007, nhar it-13 ta’ Diċembru 2007, fil-knisja parrokkjali ta’ San Ġwann tas-Salib f’Ta’ Xbiex, kien esegwit l-oratorio The Beautiful Maiden of Shunnem, kompożizzjoni ta’ Patri Daniel Sammut O.Carm., ispirat mill-Għanja tal-Għanjiet. Ħa sehem il-kor Collegium Musicum taħt id-direzzjoni ta’ Mro Dion Buhagiar, bis-sehem tas-soprani Claire Caruana u Lorraine Debono, it-tenur Frans Mangion, il-baritonu James Vella Bondin, u l-organista Romina Morrow. Ippresieda l-okkażjoni l-E.T. Mons. Pawl Cremona O.P., Arċisqof ta’ Malta.
Live recording tal-oratorio jinsab fuq 2 CDs li jinstgħu jinkisbu għall-prezz ta’ €15 mingħand Patri Jürgen Cucciardi O.Carm., Kunvent tal-Karmnu, Triq il-Parroċċa, Santa Venera SVR 1261.
CD 1 |
CD 2 |
1. Introduction followed by Love’s Desires 10:20 2. Duet Between Lovers 07:31 3. Shulamite Maiden’s Dream 16:28 4. King Solomon’s Bed 04:27 5. The Shepherd Lover’s Song 06:40 |
1. The Shulamite Maiden’s Song 09:00 2. King Solomon’s Wooing 07:58 3. An Enchanting Image 09:43 4. Finale: The Return Meeting of the Lovers 18:06 |
Patri Daniel Sammut O.Carm. - kompożitur
Patri Daniel Sammut twieled Tas-Sliema nhar is-6 ta’ Novembru 1924. Huwa studja fl-iskola tal-Istat, fl-Iskola Santu Wistin, u fil-Kulleġġ Stella Maris. Fis-sena 1940, Patri Daniel ingħaqad mal-Patrijiet Karmelitani, u wara n-novizzjat fil-kunvent tal-Imdina, għamel il-Professjoni Sempliċi nhar is-6 t’Ottubru 1941. Wara s-snin tal-formazzjoni fil-kunventi tal-Imdina u tal-Balluta, huwa għamel il-Professjoni Solenni nhar id-9 ta’ Diċembru 1945. Matul dawn is-snin, huwa studja l-Filosofija u t-Teoloġija. Nhar it-3 t’Awwissu 1947, Patri Daniel kien ordnat presbiteru fil-Kon-Katidral ta’ San Ġwann fil-Belt Valletta.
Patri Daniel beda l-istudji mużikali tiegħu ma’ Patri Tonin Vidal O.Carm., Mro Joseph Abela Scholaro, u Mro Carmelo Pace. Bejn is-snin 1956 u 1957, Patri Daniel studja fi Trinity College u fil-Guildhall School of Music f’Londra, minn fejn kiseb il-gradi A.Mus., LCM, L.Mus., TCL, L.Mus., GCM, u speċjalizza bħala kompożitur, direttur u għalliem tal-mużika, u organista. Għal tul ta’ żmien, Patri Daniel kien ukoll Kappillan tal-Ajruport Internazzjonali ta’ Malta. Għalkemm dan kien ix-xogħol prinċipali tiegħu, huwa dejjem sab il-ħin biex ikkompona numru kbir ta’ xogħlijiet mużikali.