Aħbarijiet

X'ġara dan l-aħħar

TILTAQA’ L-ASSEMBLEA ANNWALI TAL-PARROĊĊA TAL-BALLUTA

Nhar id-9 ta’ Novembru 2006 fil-Parroċċa tal-Madonna tal-Karmnu, Balluta, iltaqgħet l-Assemblea Annwali tal-Parroċċa. Wara talb u kant lill-Ispirtu s-Santu, permezz ta’ powerpoint presentation saret evalwazzjoni ta’ kif il-Parroċċa għexet il-valuri li ħarġu mis-Sinodu Djoċesan matul is-sena li għaddiet. Imbagħad, il-Kappillan ippreżenta l-Pjan Pastorali għas-snin 2007 u 2008. Dan il-Pjan ġie ffurmat permezz ta’ diversi laqgħat u suġġerimenti minn Għaqdiet u membri tal-Parroċċa. Id-Delegat ta’ Mons. Arċisqof, Patri Amadeo Zammit, O.Carm., għamel messaġġ qasir, u wara saret diskussjoni fost il-membri ta’ l-Assemblea li fiha ngħataw diversi suġġerimenti għall-ħidma pastorali.

Fl-għeluq ta’ l-Assemblea ngħatat tifkira ta’ apprezzament lis-Sur Daniel Miller u lis-Sinjorina Marjorie Vella, li kienu għadhom kif temmew is-servizz tagħhom bħala chairman u segretarja tal-Kunsill Pastorali Parrokkjali rispettivament. Għal din l-Assemblea Parrokkjali attendew madwar 125 persuna.

Jumejn wara din l-attività, nhar il-11 ta' Novembru 2006, il-Kappillan, Patri Maurice Abela, ta l-mandat lil dawk li se jservu fil-Liturġija fil-knejjes differenti tal-Parroċċa, wara li huma ħadu sehem fil-kors li sar għal-Letturi u l-Animaturi tal-Liturġija fil-Parroċċa tal-Balluta. Il-mandat ingħata waqt quddiesa li saret fil-knisja parrokkjali. Qabel bdiet il-Liturġija tal-Kelma, il-Letturi ġew mistoqsijin jekk humiex lesti li jsiru midħla tal-Kelma ta' Alla, jgħixuha u jħabbruha waqt il-Liturġija. Wara talba miċ-ċelebrant huma resqu lejn l-altar u biesu l-Bibbja bħala sinjal li lesti jaqdu dan id-dmir tagħhom.

DIKJARATA BEATA KARMELITANA ĠDIDA

Nhar il-Ħadd, 8 ta’ Ottubru 2006, fi Fiesole, l-Italja, il-Kardinal José Saraiva Martins, Prefett tal-Kongregazzjoni tal-Kawżi tal-Qaddisin, mexxa l-Quddiesa, li fiha nqrat l-Ittra Appostolika, li permezz tagħha, il-Papa Benedittu XVI, iddikkjara Beata lill-Venerabbli Marija Tereża Scrilli.

Marija Scrilli twieledet f’Montevarchi, fil-Provinċja ta’ Arezzo, l-Italja, nhar il-15 ta’ Mejju 1825, minn ġenituri tat-tajjeb, li riedu jagħtu formazzjoni kulturali, morali u nisranija tajba liż-żewġ uliedhom bniet. Ta’ 22 sena, Marija daħlet fil-monasteru Karmelitan ta’ Santa Marija Maddalena de’ Pazzi f’Firenze, imma ma damitx wisq, għax għarfet li l-vokazzjoni tagħha ma kinitx fil-klawsura, imma fid-dinja, biex “tressaq l-erwieħ lejn Alla”. Lura d-dar, saret Terzjarja Karmelitana, u bdiet il-ħidma edukattiva tagħha qalb it-tfal foqra tal-pajjiż. Fl-1852 kienet imsejjħa biex tmexxi l-iskejjel ta’ Montevarchi. Fil-15 ta’ Ottubru 1854, flimkien ma’ l-ewwel sħabha, libset il-libsa Karmelitana, u ħadet l-isem ta’ Marija Tereża ta’ Ġesù. Hekk ingħata bidu għall-Istituto Nostra Signora del Carmelo, mibni fuq l-ispiritwalità Karmelitana.

Karattestika ta’ Madre Scrilli kienet li titwaħħad ma’ Alla permezz tat-tbatija. B’xewqa kbira ta’ purifikazzjoni interjuri, u mnikkta għad-dnubiet tad-dinja u għal dawk li jitbiegħdu mit-triq tal-fidi, hija kienet dejjem lesta, biex bit-talb u s-sagrifiċċju, tbati għal Kristu. Għaddiet minn bosta tbatijiet, imma ma qatgħulhiex qalbha. Fost dawn insemmu n-nuqqas ta’ sorijiet u s-soppressjoni tal-Kongregazzjoni li waqqfet. Fost dan it-tiġrib, Marija Tereża kienet konvinta li Alla stess se jipprovdi ħaddiema biex jaħdmu fl-għalqa li xtaq hu. Hija mietet nhar il-festa tal-Qaddisin Karmelitani kollha, fl-14 ta’ Novembru 1889.

ŻEWĠ SORIJIET KARMELITANI MALTIN JAGĦLQU 50 SENA PROFESSI

Nhar is-Sibt, 14 ta’ Ottubru 2006, fis-6.00pm, fil-kappella li s-Sorijiet Karmelitani Missjunarju ta’ Santa Tereża tal-Bambin Ġesù għandhom f’Focene, qrib l-ajruport ta’ Fiumicino (Ruma), sitt sorijiet, fosthom tnejn Maltin, ġeddew għal darb’oħra il-wegħdiet tal-kastità, faqar u ubbidjenza, li għamlu 50 sena ilu! Kienet ċelebrazzjoni sempliċi imma sinifikativa. Mexxa l-quddiesa ta’ l-okkazjoni l-isqof tal-post, Mons. Gino Reali, filwaqt li kkonċelebraw il-Viċi Ġeneral ta’ l-Ordni Karmelitan, żewġ saċerdoti oħra u patri Anthony Cilia, O.Carm. Mal-ġemgħa ħadu sehem numru sabieħ ta’ qraba li ġew minn Malta u wkoll Sr Lucy Vella u Sr Cecilia Sammut li bħalissa qed jagħtu s-servizz tagħhom f’Ruma.

Iż-żewġ sorijiet li ċċelebraw il-50 sena ta’ professjoni huma Sr Agnese Chircop miż-Żurrieq u Sr Venerina Borg minn Santa Venera. Huma daħlu mas-Sorijiet Karmelitani Missjunarji meta l-Kongregazzjoni kienet għadha fil-bidu tagħha, u kien patri Bernard Farrugia, Provinċjal ta’ dak iż-żmien li fil-21 ta’ Awissu 1954 akkompanjahom personalment sa Ruma u għenhom jibdew il-ħajja reliġjuża mas-Sorijiet Karmelitani Missjunari. Fil-fatt, fil-15 ta’ Jannar 1955 huma bdew il-postulantat u fil-15 ta’ Lulju n-novizzjat. Għamlu l-ewwel Professjoni fit-3 ta’ Ottubru 1956 u dik perpetwa fl-istess jum ta’ l-1962. Wara dan iż-żmien ta’ formazzjoni l-ħajja attiva taż-żewġ sorijiet ħadet xejriet differenti.

Sr Agnese Chircop, fl-ewwel snin ta’ l-appostolat tagħha akkwistat id-diploma fit-tagħlim ta’ l-iskola, u hekk għal ħafna snin iddedikat ruħha fl-iskejjel tal-kindergarten li l-Kongregazzjoni għandha (jew kellha) fl-Italja: Iesi (1957-1960), Esperia (1960-1969), Olginasio (1969-1979), Santa Marinella (1979-1990), Moje di Maiolati (1990-1991) u Cerveteri (1991-1992). Sr Agnese kienet superjura tal-komunità ta’ Olginasio (1976-1979) u wkoll responsabbli ta’ l-ewwel komunità ta’ sorijiet li fl-1996 ħallew l-Italja biex jifthu dar ġdida fir-Rumanija. Is-sena ta’ wara Sr Agnese rritornat l-Italja fejn sal-lum, b’dedikazzjoni kbira, għadha tghin fl-iskola tal-kindergarten li s-sorijiet għandhom f’Santa Marinella.

Sr Venerina Borg kienet waħda mill-ewwel erba’ sorijiet li fil-11 ta’ Frar 1957 l-istess Fondatriċi tal-Kongregazzjoni, il-Beata Marija Kroċifissa Curcio, għażlitha biex tiftaħ il-komunità ta’ Kerċem, Għawdex. Kull bidu huwa diffiċli u l-istess ħaġa kellu jkun għas-sorijiet Karmelitani. Huma marru joqgħodu f’dar li patri Bernard Farrugia kien sabilhom b’kera f’Kerċem. Bil-għajnuna tal-kappillan, mons. Mikielang Grima, is-sorijiet bdew jilqgħu l-ewwel tfal fl-iskola tal-kindergarten. Għal ħafna snin, barra l-iskola, Sr Venerina kienet tgħallem ukoll il-katekiżmu, il-ħjata, ir-rakkmu bid-deheb tal-ħwejjeġ sagri u tgħin lin-nies bħala infermiera. Wara bosta snin f’Kerċem, fl-1989 Sr Venerina kienet mitluba tirritorna f’Santa Marinella biex tieħu ħsieb is-sorijiet anzjani, xogħol li għadha taqdi b’imħabba kbira.

ĊELEBRAZZJONIJIET MARJANI

Din is-sena, fis-Santwarju tal-Madonna tal-Karmnu tal-Belt Valletta, saru diversi ċelebrazzjonijiet f’għeluq il-125 sena mill-Inkurunazzjoni tal-Madonna tal-Karmnu. Nhar it-Tlieta 11 ta’ Lulju, mexxa l-Quddiesa tan-Novena l-E.T. Mons. Nikol Cauchi, fil-waqt li l-Erbgħa 12 ta’ Lulju mexxa l-Quddiesa l-E.T. Mons. Ġużeppi Mercieca, Arċisqof ta’ Malta. Fit-8.30 p.m. saret Akkademja Mużiko-Lettararja f’Misraħ l-Assedju l-Kbir. F’din l-Akkademja ndaqqet għall-ewwel darba l-Cantata ‘Omm Sultana tal-Karmelu’ li għandha l-kliem ta’ Patri Felician Bezzina, O.Carm., u l-mużika tas-Surmast Hermann Farrugia Frantz. Il-Quddiesa tan-Novena tal-Ħamis 13 ta’ Lulju tmexxiet mill-E.T. Mons. Adeodato Micallef, OCD. Il-Ġimgħa 14 ta’ Lulju saret it-Translazzjoni tar-Relikwa mill-knisja parrokkjali ta’ Santu Wistin għas-Santwarju, li tmexxiet mill-E.T. Mons. Felix del Blanco Prieto, Nunzju Appostoliku għal Malta. Is-Sibt 15 ta’ Lulju, fil-għaxija saret iċ-ċelebrazzjoni tat-Talba ta’ fil-Għaxija, u l-Quddiesa ta’ l-Inkurunazzjoni li tmexxiet mill-E.T. Mons. Paul Giglio, bl-omelija mill-Pirjol Patri Martin D. Schembri, O.Carm.

Nhar is-16 ta’ Lulju 2006, flimkien mal-Familja Karmelitana mxerrda mad-dinja, il-Karmelitani Maltin iċċelebraw t-Tifkira Solenni tal-Patruna tagħhom, il-Madonna tal-Karmnu. Huma nġabru fis-Santwarju Bażilka tal-Madonna tal-Karmnu fil-Belt Valletta. Fid-9.15 a.m. saret il-Quddiesa tal-festa mmexxija mill-Provinċjal, Patri Alexander Vella, bil-paniġierku minn Dun Paul C. Vella. Fis-6.00 p.m. l-E.T. Mons. Paul Giglio mexxa l-Quddiesa, li fiha saret l-omelija mill-Provinċjal, u wara ħarġet il-purċissjoni mis-Santwarju, li għaliha kien hemm numru kbir ta’ nies.

Fl-istess jum tas-16 ta’ Lulju, il-Papa Benedittu XVI, fit-talba ta’ l-Angelus, f’Valle d’Aosta, fejn jinsab għall-vaganzi tiegħu, sellem lill-Verġni Marija tal-Karmnu bħala mudell ta’ talb, kontemplazzjoni, u għotja totali lil Alla. Huwa stieden ukoll biex kulħadd jitlob għall-paċi fl-Art Imqaddsa, bl-interċessjoni tal-Verġni Marija.

IL-PAPA BENEDITTU XVI U L-MADONNA TAL-KARMNU

Nhar il-Ħadd 16 ta’ Lulju 2006, waqt li l-Papa Benedittu XVI jinsab għall-vaganzi fil-Valle d’Aosta, Italja, deher fil-pubbliku għall-ewwel diskors tiegħu quddiem folla ta’ aktar minn 5,000 pellegrin. Fid-diskors tiegħu ta’ qabel l-Angelus il-Papa tkellem dwar l-oriġini u l-kariżma ta’ l-Ordni Karmelitan b’dan il-kliem:

“Ħabat tajjeb li dan il-Ħadd inzerta s-16 ta’ Lulju, jum li fih il-liturġija tfakkar lill-Imqaddsa Verġni Marija ta’ l-Għolja tal-Karmel. Il-Karmel, promontorju għoli tiela’ mix-xatt tal-lvant tal-Baħar Mediterran, fuq l-istess livell tal-Galilija, għandu fin-niżliet tiegħu għadd ta’ għerien naturali, li dejjem kienu mfittxija mill-eremiti. L-iktar wieħed magħruf fost dawn il-bnedmin ta’ Alla kien il-kbir profeta Elija, li fis-seklu disgħa qabel Kristu ddefenda b’qawwa kbira s-safa tal-fidi f’Alla wieħed u veru kontra l-kontaminazzjoni tal-kulti idolatriċi. Fuq l-ispirazzjoni tal-figura ta’ Elija, twieled l-Ordni kontemplattiv tal-"Karmelitani", familja reliġjuża li tgħodd fost il-membri tagħha qaddisin kbar bħal Tereża ta’ Avila, Ġwanni tas-Salib, Tereża tal-Bambin Ġesù u Tereża Benedetta tas-Salib (fis-seklu, Edith Stein). Il-Karmelitani xerrdu fost il-poplu nisrani d-devozzjoni lejn l-Imqaddsa Verġni ta’ l-Għolja tal-Karmel u wrewha bħala mudell ta’ talb, ta’ kontemplazzjoni u ta’ għotja lil Alla.

Fil-fatt, Marija, qabel kulħadd u b’mod li jisboq lil kulħadd, emmnet u ġarrbet li Ġesù, il-Verb magħmul bniedem, huwa l-milja u l-quċċata tal-laqgħa tal-bniedem ma’ Alla. Hija laqgħet b’mod sħiħ il-kelma tiegħu u “waslet fil-quċċata ta’ l-għolja” (ara t-Talba Kolletta tat-Tifkira), u issa qiegħda tgħix għal dejjem, bir-ruħ u l-ġisem, mal-Mulej. F’din il-ġurnata nixtieq nitlaq f’idejn is-Sultana ta’ l-Għolja tal-Karmel lill-komunitajiet kollha ta’ ħajja kontemplattiva mxerrdin mad-dinja, u b’mod specjali lil dawk ta’ l-Ordni Karmelitan, li fosthom irrid infakkar il-monasteru ta’ Quart, mhux ’il bogħod minn hawnhekk. Jalla Marija tgħin lil kull nisrani jiltaqa’ ma’ Alla fis-skiet tat-talb.”

Wara l-Angelus: “Dan il-jum huwa ddedikat lill-Madonna tal-Karmel, Għolja fl-Art Imqaddsa, ftit kilometri bogħod mil-Libanu, li tiddomina il-belt Iżraeljana ta’ Ħajfa, li dan l-aħħar kienet ukoll milquta [mill-bombi]. Nitolbu lil Marija, is-Sultana tal-Paċi, sabiex taqla’ mingħand Alla d-don fundamentali ta’ l-għaqda, twassal il-politiċi responsabbli fit-triq tar-raġuni u tiftaħ possibiltajiet ġodda ta’ djalogu u ftehim. F’dan ix-xenarju nistieden lill-Knejjes lokali biex jagħmlu talb speċjali għall-paċi fl-Art Imqaddsa u fil-Lvant Nofsani kollu.”

FTUĦ TAR-IV ĊENTINARJU MILL-MEWT TA’ SANTA MARIJA MADDALENA DE’ PAZZI

Nhar il-25 ta’ Mejju 2006, fil-Monasteru ta’ Santa Marija ta’ l-Anġli, li jinsab fuq l-għoljiet ta’ Careggi, ftit ’il barra mill-belt ta’ Firenze (Italja), l-Ordni Karmelitan fetaħ is-sena ċentinarja li fiha jitfakkar l-400 sena mill-mewt ta’ Santa Marija Maddalena de’ Pazzi (1566-1607).

Fil-11.30 am il-Pirjol ġenerali ta’ l-Ordni Karmelitan, P. Joseph Chalmers, ta’ bidu għal quddiesa konċelebrata li fiha ħadu sehem madwar 100 reliġjuż Karmelitan fil-parti l-kbira tagħhom mill-Provinċja Karmelitana Taljana (li f’dawn il-ġranet qegħdin jiċċelebraw il-Kapitlu Provinċjali), u wkoll Karmelitani ta’ nazzjonalitajiet oħra, fosthom żewġ patrijiet Maltin: P. Anthony Cilia u P. Charlò-Carmel M. Camilleri. Kien hemm ukoll preżenti s-sorijiet ta’ l-istess monasteru u għadd sabiħ ta’ lajċi Karmelitani. Waqt l-omelija l-Pirjol ġenerali saħaq li Marija Maddalena de’ Pazzi “hija mudell għalina l-Karmelitani għax għexet l-istess Regula tagħna. Hija fittxet li tiltaqa’ ma’ Alla fit-talb, l-iktar dak liturġiku li jagħti ruħ lill-meditazzjoni personali fis-skiet u s-solitudni”. Hija għalhekk tfakkarna li l-għajn tal-ħajja spiritwali tagħna ssib l-għeruq fil-liturġija speċjalment fl-Ewkaristija u fil-meditazzjoni tal-Kelma ta’ Alla. Dawn iż-żewġ forom ta’ talb iridu jsostnuna biex aħna noħorġu dejjem minna nfusna ħalli ngħixu aktar il-kmandament ta’ l-imħabba. Il-Pirjol ġenerali semma’ wkoll li Santa Marija Maddalena de’ Pazzi “kellha mħabba tenera lejn Marija” u li taħt il-ħarsien tagħha mxiet 'il quddiem lejn l-ogħla gradi mistiċi.

Matul il-quddiesa sar talb lil Alla biex l-Ordni Karmelitan jissaħħaħ fil-qdusija u jikber b’vokazzjonijiet qaddisa, speċjalment fil-monasteru fejn sa llum għadu jinżamm ħaj l-ispirtu ta’ Santa Marija Maddalena de’ Pazzi. Wara l-quddiesa dawk prezenti resqu lejn l-artal principali tal-knisja tal-monasteru li tahtu għad hemm miżmum b’qima kbira, il-ġisem sħiħ tal-qaddisa f’urna sabiha. Qabel ħallew il-monasteru l-Karmelitani kollha kienu mistiedna fil-parlatorju biex jiltaqgħu f’mument ta’ fraternità mas-sorijiet.

Iċ-ċelebrazzjonijiet komplew bil-pranzu tal-festa fil-kunvent tal-patrijiet Karmelitani ġewwa Firenze, famuż għall-affreski tal-Masaccio li jinsabu fil-Cappella Brancacci u għal dawk li jinsabu fil-kjostru l-kbir tal-kunvent. F’dan il-kunvent spazjuż illum, minbarra l-komunità tal-patrijiet, hemm jgħixu f’parti riservata għalihom, grupp ta’ diversi familji lajċi li jibnu l-ħajja tagħhom fuq l-ispirtu tar-Regula Karmelitana.

Wara nofs inhar il-parteċipanti żaru l-monasteru l-antik li fih kienet tgħix il-qaddisa u li llum huwa s-seminarju djoċesan ta’ Firenze. Hawn, Profs. Piero Pacini, studjuż tal-qaddisa, mexxa l-grupp fil-postijiet li fihom Santa Marija Maddalena de’ Pazzi kienet tintilef f’estasi, miġbura kollha kemm hi fil-kontemplazzjoni ta’ Alla. Iż-żjara intemmet b’mument ta’ talb fil-kamra li fiha mietet il-qaddisa.

Matul din is-sena l-Ordni qed iħejji diversi ċelebrazzjonijiet reliġjużi u kulturali għal din l-okkazjoni. Fil-websajt uffiċċjali ta’ l-Ordni Karmelitan wieħed isib parti interessanti ħafna fuq il-qaddisa, b’diversi artikli, ritratti u wkoll l-opri kollha tal-qaddisa bl-ilsien oriġinali. Il-Provinċja Karmelitana Maltija se tiċċelebra din l-okkazjoni s-sena d-dieħla bi programm speċjali.

IL-KAPITLU PROVINĊJALI 2006

Dal-għodu, 1 ta’ Mejju 2006, madwar 40 reliġjuż Karmelitan iltaqgħu fid-Dar tat-Talb “Lunzjata”, Rabat, fejn ingħata bidu għall-Kapitlu Provinċjali bit-tema: “Naqdu lill-Knisja fi żmien ta’ bidla. X’għandna nagħmlu llum biex inkunu nistgħu nwasslu l-kariżma tagħna fil-ġejjieni.” Fl-istruttura karatteristika ta’ l-Ordni Karmelitan, bħall-Ordnijiet l-oħra ta’ fraternità appostolika, il-Kapitlu huwa l-ogħla awtorità u fih ir-reliġjużi jħaddmu r-responsabiltà tagħhom li jmexxu l-Provinċja flimkien, f’ubbidjenza lejn dak li Alla qed jitlob minnhom bħalissa.

Ir-reliġjużi preżenti ltaqgħu fil-kunvent tal-Lunzjata fejn fid-9.00am il-Pirjol Ġenerali ta’ l-Ordni Karmelitan, P. Joseph Chalmers, ta bidu bil-kant tal-Veni Creator. Minn hawn ir-reliġjużi baqgħu sejrin b’purċisjoni lejn il-kappella fejn l-istess Ġeneral mexxa konċelebrazjoni u talb lill-Ispirtu s-Santu biex idawwalna fil-ħidma tagħna. Għal dan it-talb tal-bidu ħadu sehem wkoll żewġ Kunsilliera Ġenerali (P. Rafael Leiva, O.Carm., u P. Anthony Scerri, O.Carm.), P.Victor Mallia, Provinċjal tar-reliġjużi Karmelitani Tereżjani, l-istudenti u l-pre-novizzi Karmelitani.

L-ewwel sessjoni tal-Kapitlu nfetħet fl-10.30am fl-awla tal-kunvent tal-Lunzjata. Il-programm kien jinkludi: kelmtejn ta’ merħba, id-diskors tal-Pirjol Ġenerali, l-approvazzjoni tal-moderatur (dak li se jmexxi il-Kapitlu) u r-rapport tal-Provinċjal dwar l-aħħar tliet snin. Fl-ewwel parti tad-diskors tiegħu, P. Alexander Vella ta ħarsa lejn il-qagħda numerika tal-Provinċja u l-bidliet li seħħew f’dawn l-aħħar tliet snin kif ukoll eżamina l-qagħda attwali tal-Provinċja biex seta’ jagħti stampa ċara fiex qegħdin, x’għamilna u x’jonqosna nagħmlu. Fit-tieni parti huwa tkellem dwar it-tmexxija provinċjali matul il-kariga tiegħu. Temm id-diskors tiegħu billi rringrazzja lil kull reliġjuż tal-Provinċja ta’ l-inkuraġġament u tar-rispett li rċieva kif ukoll talb maħfra jekk bla ma ried naqas lil xi ħadd.

Imbagħad inqara rapport mill-Kummissjoni li ħadet ħsieb il-preparazzjoni u l-elezzjonijiet bi tħejjija għal din il-laqgħa hekk importanti tal-Provinċja. Fi tmiem ir-rapport inqara r-riżultat tal-votazzjoni li saret madwar tliet xhur ilu fost ir-reliġjużi Karmelitani Maltin għall-Provinċjal u l-Kunsillieri tiegħu. Il-Pirjol Ġenerali, P. Joseph Charlmers, staqsa lil kull elett jekk jaċċettax il-kariga l-ġdida u għar-risposta affermativa tagħhom, ikkonfermahom. Dawn kienu: P. Alexander Vella, Provinċjal, u l-erba’ Kunsillieri: P. Charles Mallia, P. Maurice Abela, P. Michael Farrugia u P. Martin Schembri.

Il-Kapitlu se jibqa’ sejjer sal-5 ta’ Mejju, bejn id-9.00am u s-1.00pm. Il-programm jinkludi: diskors minn P. Anthony Scerri dwar “Naqdu lill-Knisja fi Żmien ta’ Bidla”; qari ta’ diversi rapporti; laqgħat fi gruppi u fl-assemblea ġenerali; diskussjonijiet u votazzjonijiet ta’ statuti; talb u ikel. Il-Kapitlu jagħlaq nhar il-Ġimgħa b’ċelebrazzjoni speċjali għall-ħabta tas-1.00pm.

IL-KUNGRESS NAZZJONALI TAT-TERZ ORDNI KARMELITAN

Nhar il-Ħadd, 30 ta’ April 2006, fil-knisja parrokkjali tal-Madonna tal-Karmnu, il-Balluta, sar id-49 Kungress Nazzjonali tat-Terz Ordni Karmelitan. 

Din is-sena l-programm kien jikkonsisti f’mument ta’ talb meħud mir-Regula tat-Terz Ordni li tmexxa mid-Direttur Provinċjali P. Alex Scerri, O.Carm.; minn preżentazzjoni dwar l-istorja u s-sitwazzjoni preżenti tal-Karmelu Bolivjan, minn P. Garvin Grech, O.Carm., Kummissarju Provinċjali, f’għeluq il-50 sena ta’ preżenza Karmelitana fil-Bolivja; u ċ-ċelebrazzjoni tat-Talba ta’ Fil-għaxija minn P. Alexander Vella, O.Carm., Provinċjal. Wara saret Konċelebrazzjoni mmexxija mill-Pirjol Ġenerali ta’ l-Ordni Karmelitan, P. Joseph Chalmers, flimkien mal-Kunsillieri Ġenerali P. Rafael Leiva Sanchez u P. Anthony Scerri, il-Provinċjal u d-diretturi lokali tat-Terz Ordni.  Fit-tmiem sar it-tiġdid tal-wegħdiet tal-membri fit-Terz Ordni u wkoll il-preżentazzjoni tat-traduzzjoni għall-Malti tar-Regula l-ġdida tat-Terz Ordni Karmelitan.

F’dan il-kungress ħadu sehem bosta Terzjari Karmelitani li jiffurmaw parti minn diversi komunitajiet ta’ lajċi li jsegwu l-ispiritwalità Karmelitana fil-ħajja tagħhom ta’ kuljum.

KARMELITAN MALTI “IBEN PREDILETT” TA´ TARIJA

Nhar it-30 ta’ Marzu 2006, fil-kattidral ta’ Tarija (Bolivja), saret l-Ordinazzjoni Episkopali ta’ l-Isqof il-ġdid ta´ l-istess djoċesi, Mons. Javier del Río, fil-preżenza tan-Nunzju Appostoliku, il-Kardinal u madwar 22 Isqof mill-Bolivja u l-Arġentina. Waqt iċ-ċelebrazzjoni n-Nunzju rringrazzja lil P. Albert Brincat, membru tal-Provinċja Karmelitana Maltija, li għal dawn l-aħħar sentejn ta s-servizz tiegħu bħala Amministratur Appostoliku tad-djoċesi ta’ Tarija fuq nomina tal-Papa Ġwanni Pawlu II. Wara t-tqarbin, tkellmu l-awtoritajiet tal-belt u tad-dipartiment, il-Prefett u s-Sindku. Waqt li sellmu lil Isqof il-ġdid, huma rringrazzjaw lil P. Albert ta´ kemm ħadem għal ġid ta´ Tarija bħala mexxej spiritwali għal 22 xahar. In-nies li ħadu sehem f’din l-okkazjoni u ħanqu l-kattidral urew l-apprezzament tagħhom b’ċapċipa kbira.
F´laqgħa oħra u fil-preżenza ta’ l-Isqof il-ġdid u ta’ l-isqfijiet l-oħra kollha, P.Albert Brincat kien onorat mill-President tal-Kunsill Muniċipali bil-midalja ta´ “Iben Predilett” ta´ Tarija bħala turija ta’ rispett u apprezzament tal-belt għal dak kollu li għamel matul iż-żmien ta’ Amministratur Appostoliku.
L-għada tal-Ordinazzjoni, f´laqgħa tal-prefettura, il-Prefett ta’ Tarija reġa´ wera r-rikonoxxenza tiegħu lejn P. Albert fil-preżenza tan-Nunzju u l-Isqof il-ġdid u bħala sinjal ta’ hekk ingħataw poncho u kappell tipiku ta´ Tarija.

Għalkemm għadha mhiex uffiċċjali, l-Isqof ta´ Tarija (Bolivja), Mons. Javier del Río, diġà talab lil P. Albert Brincat biex jgħinu bħala Vigarju Ġenerali tad-Djoċesi.

Dan kollu huwa sinjal ċar tal-ħidma kbira u effiċjenti li l-missjunarji Karmelitani Maltin wettqu u għadhom jagħtu fost il-Bolivjani matul dawn l-aħħar 50 sena. Huwa wkoll ta’ nkoraġġiment kbir għalina li ninsabu Malta biex inkomplu ngħinu l-ħidma tagħhom bil-mezzi kollha possibbli.

IR-REGULA TAT-TERZJARJI KARMELITANI

Sa mill-ewwel seklu tal-eżistenza ta’ l-Ordni Karmelitan, jiġifieri sa mis-seklu tlettax, kien hemm xi lajċi li miġbudin mill-ispiritwalità tagħna, kienu jikkonsagraw ruħhom lil Alla u jqegħdu ruħhom taħt l-ubbidjenza tal-pirjol ta’ xi kunvent Karmelitan waqt li jibqgħu joqogħdu d-dar u jibqgħu lajċi. Bil-mod il-mod dawn bdew jorganizzaw ruħhom fi gruppi. Imbagħad, beda jinħass il-bżonn li dawn il-gruppi jiġu organizzati. Għal din il-ħidma daħal b’ruħu u ġismu l-Pirjol Ġenerali tal-Ordni l-Beatu Ġwann Soreth. Dan kien hekk imsaħħar mill-ideal Karmelitan, li barra li ddedika ħajtu għar-riforma tar-reliġjużi rġiel, stinka ħafna biex iwaqqaf is-sorijiet tal-klawsura u jagħti forma aktar organizzata lil dawk il-lajċi li riedu jissieħbu fl-Ordni. Jingħad li kien hu li fl-1455 kiteb l-ewwel regula tat-Terzjarji, biex jadatta r-Regula ta’ S. Albert għal-lajċi.

“BOLLI PERSONALI” B’TIFKIRA

Kien is-sena l-oħra meta l-Malta Post nidiet skema ta’ “bolli personali”. Ma kinetx okkażjoni ta’ min jitlifha! Il-komunità tal-Patrijiet Karmelitani tal-belt Valletta, ħatfuha minnufih. B’hekk għall-ewwel darba f’Malta nħarġet “bolla personali” bis-suġġett ikun it-tifkira tal-125 sena mill-inkurunazzjoni solenni ta’ l-ewwel xbiha tal-Madonna fil-gżejjer ta’ Malta u Għawdex.

B’editt maħruġ mill-Vatikan, il-Papa Ljun XIII amar li x-xbiha tal-Madonna tal-Karmnu meqjuma fis-santwarju ddedikat lilha fil-belt Valletta, kellha tkun inkurunata solennement. Dan kien minħabba d-devozzjoni kbira li l-poplu Malti wera lejn il-Madonna tal-Karmnu, u l-grazzji li kienu jinqalgħu bit-talb lill-Madonna quddiem din ix-xbiha. L-inkurunazzjoni solenni saret nhar il-15 ta’ Lulju 1881 fl-istess knisja santwarju u bażilika, quddiem poplu ferħan li ħanaq il-knisja u l-inħawi bi ħġaru! Id-delegat mill-Vatikan biex ipoġġi l-kuruna magħmula mid-deheb u ħaġar prezzjuż fuq ras il-Madonna, kien l-Eċċellenza Tiegħu Monsinjur Arċisqof Carmelo dei Coni Scicluna. Il-kuruna tal-Madonna (kif ukoll dik tal-Bambin) kienet inħadmet fil-belt kapitali tagħna fi Triq Żekka.

Il-ħsieb ewlieni li l-125 sena mill-inkurunazzjoni jkun imfakkar b’din il-“bolla personali” kien tas-sur Dennis Caruana. Il-komunità Karmelitana tas-Santwarju laqgħet u aċċettat it-twettiq ta’ din il-proposta nhar it-12 ta’ Diċembru 2005. Minnufih bdew il-kuntatti mal-persuni responsabbli fil-Malta Post, biex fit-3 ta’ Jannar 2006 ħarġet il-“bolla personali” tat-tifkira, magħquda mal-bolla postali definittiva tas-7c. L-għażla tal-bolla tas-7c saret minħabba li din hija l-iktar waħda popolari. Il-“bolla” tat-tifkira ġiet iddisinjata mis-Sur Victor Galea fuq ritratt meħud mis-Sur George Farrugia.

Fl-ewwel edizzjoni ġew mitbugħa elf (1000) bolla u fit-tieni edizzjoni ħames mija (500) oħra. F’Lulju ta’ din is-sena ser jinħarġu ħames mitt (500) bolla oħra flimkien ma’ timbru postali ta’ l-okkażjoni. Nhar il-15 ta’ Lulju, li huwa jum l-anniversarju ta’ l-inkurunazzjoni solenni, ser joħroġ “first day cover” ta’ l-okkazjoni.

KORS TA’ FORMAZZJONI PERMANENTI INTERNAZZJONALI

Bejn it-23 ta’ Jannar u l-5 ta’ Frar 2006 madwar 30 reliġjużi, bejn patrijiet, sorijiet ta’ Istituti ta’ ħidma appostolika u sorijiet tal-klawsura, iltaqgħu fid-Domus Carmelitana, f’Ruma (Italja), biex flimkien jistudjaw waħda mill-aktar riformi importanti ta’ l-Ordni Karmelitan: Ir-Riforma ta’ Touraine.  Din ir-riforma seħħet ftit wara r-Riforma li għamlet S. Tereża ta’ Ġesù imma sfortunatament ma kelliex l-effett mixtieq.  B’danakollu nistgħu ngħidu li din ir-riforma tat kontribut kbir fl-Ordni għax l-ispiritwalità Karmelitana li qed ngħixu llum għandha l-bażi tagħha f’din ir-riforma ta’ Touraine.

Matul dawn il-hmistax ta’ Formazzjoni Permanenti ħadu sehem mhux inqas minn erbgħa studjużi ta’ l-Ordni Karmelitan mill-Italja, l-Olanda, il-Brażil u l-Ġermanja, li kienu:  P. Emanuele Boaga, Sr. Sanny Brujins, P. Romero de Lima Gouvea u P. Michael Plattig.  Huma taw il-kontribut tagħhom fl-għarfien ta’ din ir-riforma u l-ispiritwalità tagħha.  Infatti l-ewwel ġimgħa kienet dedikata għal tagħrif ġenerali dwar din ir-riforma u wkoll ta’ introduzzjoni għall-personaġġi importanti li taw kontribut kbir fl-iżvilupp tagħha. Dawn kienu l-Ven. Ġwanni ta’ S. Sansun, il-Ven. Marie Petyt, il-Ven. Mikiel ta’ Santu Wistin u Filippu Ribot. It-tieni ġimgħa kienet dedikata għal approfondiment tal-kitbiet tagħhom u wkoll għad-diversi forom ta’ talb.  Il-kors għalaq b’tagħrif dwar il-kontribut u s-sinifikat li għandha din ir-riforma għaż-żmien ta’ llum.

Il-kors kien organizzat mill-Kummissjoni Internazzjonali għall-Formazzjoni Permanenti ta’ l-Ordni Karmelitan li bħalissa hija mmexxija mill-Provinċjal, P. Alexander Vella. Minn Malta ħa sehem f’dan il-Kors, P. Joe Saliba, il-Kappillan tal-Fgura, filwaqt li P. Charlo Camilleri kien wieħed mit-tradutturi.

LAQGĦA ANNWALI TAL-CARMELITE LIBRARIANS' ASSOCIATION

Wara li matul l-aħħar snin, fl-Ordni Karmelitan kienet qiegħda tinħass il-ħtieġa għal sensitività akbar f’dak li għandu x’jaqsam mal-kultura u l-bibljoteki ta’ l-Ordni, fl-2004 ġie deċiż li titwaqqaf assoċjazzjoni li tieħu ħsieb il-bibljoteki ta’ l-Ordni fid-diversi Provinċji. Permezz ta’ din l-Assoċjazzjoni, jissaħħu dejjem aktar il-kuntatt u l-ko-operazzjoni bejn l-istess bibljoteki.

Bejn il-5 u s-7 ta’ Jannar 2006, fiċ-Ċentru Pastorali tad-Djoċesi ta’ Nantes fi Franza, saret il-ħames laqgħa annwali ta’ din l-assoċjazzjoni. Ħadu sehem 24 persuna, bejn reliġjużi Karmelitani u lajċi li jgħinnu jew jaħdmu fil-bibljoteki Karmelitani. Il-laqgħa tmexxiet minn Patri Mark Attard, O.Carm., li huwa d-Delegat Ġenerali ta’ l-Ordni Karmelitan għall-Kultura, u President ta’ l-istess Assoċjazzjoni. Il-Provinċja Karmelitana Maltija kienet rappreżentata minn Patri Jürgen Cucciardi, O.Carm. Karmelitan Malti ieħor li ħa sehem huwa Patri Edmond Caruana, O.Carm., li huwa l-bibljotekarju tal-librerija ġenerali taċ-Ċentru Internazzjonali Sant’Albert f’Ruma.

Matul din il-laqgħa saret diskussjoni dwar is-sistemi li jinsabu għaddejjin minnhom id-diversi bibljoteki, u wkoll dwar it-twaqqif ta’ bibljoteki ġodda, l-aktar f’dawk il-pajjiżi li fihom l-Ordni Karmelitan għadu qiegħed jikber. Saret diskussjoni wkoll dwar il-possibiltà li ’l quddiem jista’ jkun hemm il-katalgi tal-bibljoteki differenti on-line sabiex ikun hemm aċċess aktar faċli u mifrux għalihom. Wara l-laqgħa annwali sar ukoll kors bażiku qasir għal dawk li għadhom ġodda fil-qasam tal-bibljoteki.

VENERABBLI SUOR MARIJA TEREŻA TA' ĠESÙ (1825-1889)

Fl-20 ta’ Diċembru 2005 il-Kongregazzjoni għall-Kawżi tal-Qaddisin tal-Vatikan, aċċettat il-miraklu għall-Beatifikazzjoni tal-Venerabbli Suor Marija Tereża ta’ Ġesù (fis-seklu: Maria Scrilli), fundatriċi tas-sorijiet Istituto di Nostra Signora del Carmelo.

Suor Marija Tereża twieldet fil-15 ta’ Mejju 1825 fir-raħal ta’ Montevarchi (Arezzo), fl-Italja. Hija saret Terzjarja Karmelitana u bdiet taħdem għall-edukazzjoni tat-tfajliet fqar tar-raħal tagħha. Fl-1854 hija waqfet il-Kongregazzjoni tas-Sorijiet li kienet affiljata ma' l-Ordni Karmelitan fil-31 ta' Marżu 1929. Il-ħidma ta' Suor Marija Tereża ħalliet frott kbir għax illum il-Kongregazzjoni tagħha tinsab preżenti fl-Istati Uniti, Kanada, Polonja, Indja, Brażil u fir-Reppubblika Ċeka. Il-Fundattrici mietet fl-14 ta’ Novembru 1889 u fl-20 ta’ Diċembru 2003 il-Papa Ġwanni Pawlu II iddikjarha Venerabbli.

Fl-istess okkazjoni ta' l-20 ta' Diċembru 2005 kien approvat ukoll il-miraklu ta’ żewġ Sorijiet Karmelitani Tereżjani: Suor Elijah ta’ San Klement (1855-1938), fundatriċi ta' grupp ta' sorijiet, u Suor Maria Tereża ta’ San Ġużepp (1901-1927), soru tal-klawsura.

QUDDIESA TA’ RADD IL-ĦAJR

Nhar il-Ħadd, 13 ta’ Novembru 2005, fil-Bażilika San Pietru tal-Vatikan, il-Kardinal José Saraiva Martins, Prefett tal-Kongregazzjoni tal-Kawżi tal-Qaddisin, mexxa ċ-Ċelebrazzjoni Ewkaristika li fiha kienu ibbeatifikati Charles De Foucauld, Maria Pia Mastena u Maria Crocifissa Curcio.

L-Erbgħa ta’ wara, 16 ta’ Novembru, fil-Bażilika Santwarju tal-Madonna tal-Karmnu fil-Belt Valletta, il-Provinċja Karmelitana f’Malta ċċelebrat Quddiesa ta’ Radd il-Ħajr lil Alla għall-Beatifikazzjoni ta' Madre Maria Crocifissa Curcio, fundatriċi tas-Sorijiet Karmelitani Missjunarji ta' S. Tereża tal-Bambin Ġesù. Ikkoncelebraw flimkien mal-Provinċjal P. Alexander Vella, O.Carm., il-Provinċjal tal-Karmelitani Skalzi f’Malta, P.Victor Mallia, OCD, xi reliġjużi Karmelitani u Qassisin Terzjarji. F’din il-quddiesa ħadu sehem numru sabiħ ta' Terzjarji. Fil-bidu tal-Quddiesa ġiet inawgurata pittura tal-Beata Karmelitana u tqegħdet għall-qima tal-pubbliku r-relikwija tal-Beata. It-talbiet tal-Fidili nqraw minn membri ta' friegħi differenti tat-Terz Ordni Karmelitan. Il-Komunità tal-Belt ħadet ħsieb tistampa għall-pubbliku xbihat ta’ tifkira tal-Beata flimkien ma' talba u kwotazzjoni tagħha.

Waqt l-omelija l-Provinċjal qal li l-ħajja ta' Madre Maria Crocifissa Curcio hi kummentarju ħaj ta’ dak li jgħid Ġesù fl-Evanġelju li nqara fl-istess quddiesa: “Infaħħrek Missier, Sid is-sema u l-art għax inti għarraft il-misteri tas-Saltna liċ-ċkejknin” (Mt 11, 25). “Madre Crocifissa kienet waħda miċ-ċkejknin li Alla għarrafha l-misteri tas-Saltna. Ġesù għarrafha dawn il-misteri fl-Ewkaristija għax daħħalha ‘l ġewwa fil-misteru tat-Trinità Qaddisa, sar il-mistrieħ ta' ruħha u għamlilha qalbha ħelwa u umli bħal tiegħu. L-Ewkaristija tibdilna f'Ġesù u tħeġġiġna biex inġeddu l-umanità. Bħala ruħ Karmelitana, Madre Maria Crocifissa Curcio, fl-esperjenza spiritwali tagħha, ħasset dejjem il-preżenza ta’ Marija takkumpanjaha fil-mixja tagħha wara Kristu.”

TIFKIRA TAL-MEJTIN TAL-PROVINĊJA TAGĦNA

Nhar is-Sibt, 12 ta’ Novembru 2005, il-Provinċja Karmelitana Maltija, fakkret lill-mejtin tagħha b’talb li sar fiċ-Ċimiterju ta’ Santa Marija Addolorata, Raħal Ġdid.

Ġiet iċċelebrata Quddiesa fil-Kappella taċ-ċimiterju, li tmexxiet mill-Provinċjal Patri Alexander Vella, bis-sehem ta’ reliġjużi, Terzjarji u ħbieb tal-Provinċja. Wara l-Quddiesa sar talb u tkantat il-Flos Carmeli fuq il-qabar tar-Reliġjużi fl-istess ċimiterju.

F’dan iċ-ċimiterju jinsabu midfunin ir-reliġjużi tal-Provinċja li mietu mill-1974 ‘il quddiem.  Ir-Reliġjużi li mietu qabel l-1974 jinsabu midfuna fil-kannierja li hemm taħt il-knisja tal-Karmnu ta’ l-Imdina.

Matul din is-sena r-Reliġjużi li għaddew għall-ħajja ta’ dejjem huma:
● Patri Hugh Mallia li miet fis-27 ta’ Frar 2005 fil-kunvent Karmelitan ta’ Gort Muire, l-Irlanda, u
● Patri Pawlin Cremona, mill-Kunvent il-qadim ta’ Santa Venera, li miet fil-5 ta’ Mejju 2005.

L-Ordni Karmelitan jiftakar b’mod speċjali fl-Aħwa kollha mejtin fil-15 ta’ Novembru u jitlob hekk: “O Alla sebħ tal-qaddejja tiegħek, agħti lil ħutna kollha mejtin ta’ l-Ordni tagħna, illi jkunu jistgħu jikkontemplawk għal dejjem bħala mexxej u feddej, huma li, magħqudin magħna bl-ilma fejjiedi tal-magħmudija u r-rabta qaddisa tal-Karmelu, imxew f’ħajjithom wara Kristu u Ommu Marija.”

ŻEWĠ PROFESSJONIJIET

Nhar il-Ġimgħa 23 ta’ Settembru 2005, il-Provinċja Karmelitana Maltija ċċelebrat il-Professjoni Sempliċi ta’ Fra Victor Paul Farrugia u Fra Daniel Galea. Huma għamlu l-pre-novizzjat tagħhom fid-Dar tal-Formazzjojni, il-Balluta, u mbagħad is-sena tan-novizzjat f’Salamanca, Spanja. Permezz ta’ din il-Professjoni ħutna Victor Paul u Daniel ingħataw lil Alla permezz tal-wegħdiet li għamlu quddiem il-W.R.P. Alexander Vella, Pirjol Provinċjali.

Iż-żmien tal-Professjoni Sempliċi, li bħala regula huwa ta' tlett snin, huwa wieħed fejn il-kandidat jibda jgħix il-voti reliġjużi tal-ubbidjenza, faqar u kastità. Dan il-perjodu jwassal għall-Professjoni Solenni meta l-individwu jingħata lil Alla b’mod aktar sħiħ billi jwiegħed li jgħix direttament għaliH għal dejjem.

Fil-fatt nhar il-Ġimgħa 7 ta’ Ottubru 2005, il-Provinċja Karmelitana Maltija ċċelebrat il-Professjoni Solenni ta’ Fra Josef M. Cutajar. Permezz tal-Professjoni Solenni, ħuna Josef intelaq għal dejjem fl-imħabba ta’ Alla sabiex għaliH jgħix il-Ħajja Karmelitana sal-milja tagħħa skond ir-Regula u l-Kostituzzjonijiet ta’ l-Ordni tagħna. Din iċ-ċelebrazzjoni saret fil-Knisja Parrokkjali ta’ Santa Venera fost qraba, ħbieb u reliġjużi li lkoll kienu xhieda ta’ din l-għotja sħiha ta’ Fra Josef lil Alla fl-Ordni Karmelitan.

IL-KAPITLU PROVINĊJALI 2006

B’ittra maħruġa fl-1 ta’ Ottubru 2005, P. Alexander Vella, O.Carm., Provinċjal, ħabbar li l-Kapitlu Provinċjali tar-reliġjużi Karmelitani Maltin se jsir mill-1 sal-5 ta’ Mejju 2006 fid-Dar tat-Talb “Lunzjata”, Rabat. Fl-istruttura karatteristika ta’ l-Ordni Karmelitan, bħall-Ordnijiet l-oħra ta’ fraternità appostolika, il-Kapitlu huwa l-ogħla awtorità u fih ir-reliġjużi jħaddmu r-responsabiltà tagħhom li jmexxu l-Provinċja flimkien, f’ubbidjenza lejn dak li Alla qed jitlob minnhom bħalissa.

Skond l-Istatut tal-Provinċja kull reliġjuż Karmelitan li jinsab Malta għandu dritt u dmir li jieħu sehem fil-Kapitlu, imma b’mod specjali: il-Provinċjal u l-Kunsilliera l-godda, il-Provinċjal u l-Kunsilliera u s-Segretarju Provinċjali li jkunu għadhom kemm spiċċaw, il-Kummissarju Provinċjali tal-Bolivja, l-Ekonomu Provinċjali, il-Pirjoli tal-komunitajiet li jinsabu f’Malta, il-membri tal-Kunsill tal-Formazzjoni, ir-Rettur tal-Kulleġġ San Elija, u l-Kappillani tal-Parroċċi Karmelitani f’Malta.

It-tema mgħażula bħala ispirazzjoni għall-Kapitlu Provinċjali 2006 hija dik tal-Kongregazzjoni Ġenerali iċċelebrata f’São Paulo, il-Brażil, f’Settembru 2005: “Naqdu lill-Knisja fi żmien ta’ bidla. X’għandna nagħmlu llum biex inkunu nistgħu nwasslu l-kariżma tagħna fil-ġejjieni.” Fi kliem il-Provincjal, “Id-dinja li qed ngħixu fiha hija dinja li għaddejja b’ritmu mgħaġġel minn bidliet kbar. Dawn jolqtu lilna wkoll, bit-tajjeb u l-ħażin tagħhom. Jekk tassew nemmnu li l-Ispirtu ta’ Alla jkellimna fil-ġrajjiet ta’ madwarna, ma nistgħux nibqgħu passivi quddiem dawn il-bidliet. Jeħtieġ niftħu widnejna tajjeb għal dak li l-Ispirtu jrid jgħidilna u jkollna l-kuraġġ li nwieġbu b’mod kreattiv għas-sejħat ġodda li qed jagħmlilna fi żminijiet ġodda.”

Bi tħejjija għal dan l-avveniment hekk importanti għall-Familja Karmelitana, il-Kunsill Provinċjali waqqaf Kummissjoni magħmula minn P. Charles Mallia (president), P. Jürgen Cucciardi (segretarju), P. Joseph Saliba u P. Michael Farrugia. Din il-Kummissjoni għandha r-responsabbiltà li tieħu ħsieb l-organizzazjoni kollha minn issa sal-Kapitlu Provinċjali. P. Renald Lofreda ġie maħtur biex jieħu ħsieb il-Liturġija waqt il-Kapitlu.

Il-Provinċjal stieden u ħeġġeġ lir-reliġjużi Karmelitani Maltin kollha biex jieħdu sehem attiv fit-tħejjija tal-Kapitlu billi jipparteċipaw fil-laqgħat ta’ preparazzjoni li se jsiru u fuq kollox, li jibdew jitolbu minn issa biex il-Kapitlu Provinċjali jħalli l-frott. L-istess appell nagħmluh lill-insara kollha li jagħmlu parti mill-parroċċi tagħna l-Karmelitani jew b’xi mod qed jieħdu sehem mis-servizz tagħna r-reliġjużi biex matul dan iż-żmien jitolbu magħna sabiex il-Kapitlu 2006 ikun ta’ ġid għall-Provinċja Karmelitana Maltija u għall-Knisja.