Aħbarijiet

X'ġara dan l-aħħar

JINGĦATAW IL-MINISTERU TAL-LETTORAT

Nhar il-Ġimgħa, 27 ta' April 2007, fil-Knisja Parrokkjali tal-Madonna tal-Karmnu, fil-Fleur-de-Lys, Victor Paul Farrugia, O.Carm., u Daniel Galea, O.Carm., ingħataw il-ministeru ta' letturi, waqt quddiesa konċelebrata immexxija minn P. Alexander Vella, O.Carm., pirjol provinċjali. Bil-ministeru tal-Lettorat dawn iż-żewġ reliġjużi ingħataw id-dmir li jxandru l-Kelma ta' Alla u jgħallmuha lil ħuthom il-bnedmin mhux biss bix-xandir fil-quddiesa imma wkoll b'kull mezz. Hekk huma jkomplu jgħinu lill-Knisja tobdi l-kmand tal-Mulej: "Morru fid-dinja kollha, u xandru l-bxara t-tajba lill-bnedmin kollha u għallmuhom iharsu dak kollu li għallimtkom jien". Victor Paul u Daniel jinsabu fit-tieni sena tal-professjoni temporanja u fit-tielet sena ta' l-istudji teoloġiċi. Il-lettorat jimmarka wkoll il-bidu tal-mixja lejn l-Ordinazzjoni djakonali u presbiterali.

L-ARĊISQOF FIL-PARROĊĊA TAL-BALLUTA

L-Arċisqof Monsinjur Pawl Cremona beda ż-żjajjar tiegħu fl-Unitajiet Pastorali ta’ l-Arċidjoċezi ta’ Malta. L-ewwel waħda minn dawn il-laqgħat saret il-Ħadd 18 ta’ Frar 2007, fl-Unità 10, li hi ffurmata minn dawn il-Parroċċi: Stella Maris, Sacro Cuor, San Girgor, Tal-Karmnu u ĠesùNażżarenu.

Il-programm beda fit-3.30 p.m. fil-Pjazza tal-Balluta b’kant mill-Kor San Damjan tal-Parroċċa tas-Sacro Cuor. Fl-3.45 p.m. wasal Monsinjur Arċisqof fejn ġie milqugħ mill-Kappillani tal-Parroċċi ta’ Tas-Sliema u tal-Balluta. Wara sar diskors minn ħamest itfal u l-Arcisqof twassal sal-Knisja Parrokkjali tal-Balluta, akkumpanjat mill-Banda ta’ l-Iscouts u numru sabiħ ta’ nies.

Kif l-Arċisqof daħal fil-Knisja, fejn sab jistennewh numru akbar ta’ nies, baqa’ sejjer jitlob fl-Kappella tas-Sagrament. Wara ngħata merħba mis-Sur Joe Gatt, Moderatur ta’ l-Unità 10. Il-programm kompla b’talb u riflessjoni dwar: it-tfal u ż-żgħażagħ (mill-Parroċċa tal-Balluta); il-familja (mill-Parroċċa ta’ San Girgor); l-anzjani (mill-Parroċċa ta’ Stella Maris); il-vokazzjonijiet (mill-Parroċċa tas-Sacro Cuor); u l-motto ta’ l-Arcisqof “Ħejju t-triq għall-Mulej” (mill-Parroċċa tan-Nażżarenu). Tkantaw ukoll diversi innijiet minn Kor kbir li kien iffurmat minn diversi korijiet tal-Parroċċi ta’ l-Unità, u li tmexxa minn Marie Therese Vassallo, Direttriċi tal-Kor Fjur tal-Karmelu, Balluta.

Il-qofol taċ-ċelebrazzjoni kien id-diskors ta’ l-Arċisqof u l-Barka Sagramentali. L-Arċisqof ingħata wkoll rigal (kwadru – ritratt tal-Beatu Gwanni XXIII), li ġie preżentat lilu mill-Kappillan tal-Parroċċa tas-Sacro Cuor, Patri George Bugeja, OFM, f’isem il-Parroċċi ta’ l-Unità.

Kif intemmet iċ-ċelebrazzjoni l-Arċisqof mexa fost il-poplu fil-Knisja u twassal sal-Kunvent tal-Balluta fejn iltaqa’ mas-Sacerdoti u r-Reliġjuzi ta’ l-Unità. L-Arċisqof żar ukoll id-Dar tal-Formazzjoni Karmelitana.

FTUĦ TAL-ĠUBLEW KARMELITAN 2007

Nhar il-Ħamis, 11 ta’ Jannar 2007, il-Patrijiet Karmelitani u Karmelitani Skalzi f’Malta taw bidu għall-Ġublew Karmelitan 2007, permezz ta’ Quddiesa Solenni li saret fil-knisja parrokkjali tal-Balluta u tmexxiet mill-Arċisqof Ġużeppi Mercieca. Il-Ġublew ifakkar it-800 sena mill-għoti tar-Regola Karmelitana, is-700 sena mill-mewt ta’ San Albert ta’ Trapani u l-400 sena mill-mewt ta’ Santa Marija Maddalena de’ Pazzi.

Fil-bidu tal-Quddiesa, il-Provinċjal Patri Victor Mallia, OCD, ta merħba lill-Arċisqof u daħħal lil dawk preżenti fl-ispirtu taċ-ċelebrazzjoni. L-omelija saret mill-Provinċjal Patri Alexander Vella, O.Carm., li tkellem dwar l-elementi bażiċi tal-ħajja Karmelitana. Fl-aħħar tal-Quddiesa, Mons. Arċisqof wassal il-messaġġ tiegħu.

L-għan tal-Ġublew Karmelitan 2007 huwa doppju: li jservi ta’ tiġdid għar-reliġjużi Karmelitani u Karmelitani Skalzi, u biex tinfirex aktar l-ispiritwalità Karmelitana. Bħall-Qaddisin Albert ta’ Trapani u Marija Maddalena de’ Pazzi, il-Karmelitani jfittxu li jgħixu s-sejħa tagħhom ibbażata fuq ir-Regola Karmelitana, b’entużjażmu u b’fedeltà kreattiva għaż-żmien li qegħdin ngħixu fih illum. Iċ-ċelebrazzjonijiet ta’ dan il-Ġublew ikomplu fix-xhur li ġejjin.