Aħbarijiet

X'ġara dan l-aħħar

L-EWWEL ŻJARA
TAL-PIRJOL ĠENERALI TAL-KARMELITANI F’MALTA

Bħalma kien programmat, bejn l-4 u 6 t’Ottubru 2008, il-Provinċja Karmelitana Maltija laqgħet għall-ewwel darba lir-Rev.mu P. Fernando Millan Romeral, Pirjol Ġenerali tal-Ordni Karmelitan, tul żjara qasira imma intensiva fl-okkażjoni tal-inawgurazzjoni uffiċjali tal-Carmelite Institute Malta li saret fil-knisja tal-Karmnu tal-Imdina. Huwa kien akkumpanjat mill-Postulatur Ġenerali u president tal-Institutum Carmelitanum ta’ Ruma, P. Giovanni Grosso, O.Carm.

Il-Pirjol Ġenerali għalaq il-programm tal-inawgurazzjoni b’diskors li fih faħħar din l-inizjattiva kif ukoll l-ispirtu ta’ kollaborazzjoni li bih twettqet miż-żewġ Ordnijiet Karmelitani (O.Carm – OCD) f’Malta: il-Provinċja Karmelitana ta’ Sant’Elija u l-Provinċja Karmelitana Tereżjana tal-Qalb ta’ Ġesù. Huwa awgura li l-Carmelite Institute Malta jagħti kontribut siwi lid-diversi oqsma ta’ riflessjoni teoloġika f’pajjiżna, kif ukoll lill-Knisja lokali u lis-soċjetà Maltija b’mod ġenerali.

Matul il-jumejn li dam f’Malta, il-Pirjol Ġenerali ħa wkoll l-opportunità li jżur uħud mill-komunitajiet Karmelitani tal-Provincja u jiltaqa’ ma’ xi realtajiet tal-Familja Karmelitana f’Malta. Is-Sibt filghaxija mexxa quddiesa kkonċelebrata fis-Santwarju Bażilika tal-Madonna tal-Karmnu fil-Belt Valletta. Il-Ħadd filgħodu qaddes quddiesa għaż-żgħażagħ fil-knisja parrokkjali ta’ Fleur-de-lys, u filgħaxija mexxa l-Kungress Nazzjonali tat-Terz Ordni Karmelitan b’quddiesa kkonċelebrata fil-knisja parrokkjali ta’ Santa Venera.

FTUĦ UFFIĊJALI TAL-CARMELITE INSTITUTE MALTA

Nhar is-Sibt, 4 ta’ Ottubru 2008, fl-10.00 a.m., fil-Knisja tal-Karmnu tal-Imdina se jiġi inawgurat uffiċjalment il-Carmelite Institute Malta. Il-programm tal-inawgurazzjoni jikkonsisti f’żewġ taħditiet minn żewġ esperti fl-ispiritwalità Karmelitana. Il-Professur P. Kees Waaijman, O.Carm., li huwa d-Direttur tal-Istitut Titu Brandsma tal-Università Radbound ta’ Nimega fl-Olanda, se jitkellem fuq “Carmel: An Empty Space for God”. P. Eugene McCaffrey, OCD, pirjol tal-komunità Tereżjana ta’ Tabor Retreat House fi Preston, l-Ingilterra, se jitkellem fuq “Carmel: A Lover’s Quest”. Il-programm se jkun imżewwaq b’kant reliġjuż mill-mezzo-soprano Claire Massa akkumpanjata fuq l-arpa minn Caroline Calleja. Għal din l-okkażjoni se jkun preżenti l-Pirjol Ġenerali tal-Karmelitani, P. Fernando Millán Romeral, li se jkun Malta għall-ewwel darba.

Il-Carmelite Institute Malta huwa inizjattiva li l-Provinċja Karmelitana Maltija u l-Provinċja Karmelitana Tereżjana Maltija qegħdin jieħdu flimkien biex jippromwovu f’Malta l-istudju tal-ispiritwalità u t-tradizzjoni Karmelitana. L-iskop ewlieni tal-Istitut huwa li  jorganizza korsijiet ta’ livelli differenti fl-Ispiritwalità Karmelitana u l-Marjoloġija. Fil-fatt l-Istitut ġa beda l-ħidma tiegħu billi qed jikkollabora mal-Fakultà tat-Teoloġija tal-Università ta’ Malta fi programm ġdid ta’ MA in Spirituality li se jiftaħ fit-2 ta’ Ottubru 2008. L-istudenti li japplikaw għal dan il-kors għandhom il-possibbiltà li jagħżlu li jispeċjalizzaw fl-ispiritwalità Karmelitana. Hemm il-ħsieb li s-sena d-dieħla l-Carmelite Institute Malta joffri kors fl-ispiritwalità Karmelitana, li jkun miftuħ għal kulħadd. L-Istitut għandu s-sede tiegħu fil-Kunvent tal-Karmnu tal-Imdina.

P. Alexander Vella, O.Carm.                    P. Alfred V. Grech, O.C.D.
Provinċjal                                            Provinċjal  
Ko-President tal-Istitut                          Ko-President tal-Istitut
Email: alexander.vella@um.edu.mt            Email: avg@vol.net.mt

MADRE CANDELARIA TA’ SAN ĠUŻEPP
Beata Karmelitana ġdida

Nhar il-Ħadd, 27 ta’ April 2008 il-Kardinal José Saraiva Martins, Prefett tal-Kongregazzjoni għall-Kawżi tal-Qaddisin, mexxa f’Caracas fil-Venenzuela, iċ-ċerimonja tal-beatifikazzjoni ta’ Madre Candelaria ta’ San Ġużepp, fundatriċi tas-Sorijiet Karmelitani tal-Venenzuela.  Id-digriet li bih il-Papa Benedittu XVI approva l-miraklu li sar bl-interċessjoni ta’ din il-Qaddejja ta’ Alla kien iffirmat fis-6 ta’ Lulju 2007.

Il-beata l-ġdida twieldet fil-11 ta’ Awissu 1863, u kienet mogħtija l-isem Susanna Paz-Castillo Ramírez.  Sa minn ċkunitha laqgħet is-sejħa għall-qdusija u kienet tipprattika l-imħabba tagħha billi tassisti, tfarraġ u tieħu ħsieb il-morda li kienu jitħallew fit-toroq tal-belt.  Imħeġġa minn Dun Sixto Sosa (li aktar tard kien maħtur Isqof ta’ Cumaná), ikkonsagrat ruħha għas-servizz tal-morda fl-isptar “Sant'Antonio”, imwaqqaf fl-1903 f’Altagracia de Orituco.

Bil-għajnuna ta' l-istess Dun Sixto, fil-31 ta’ Diċembru 1910 waqqfet il-Kongregazzjoni tas-Sorijiet iż-Żgħar tal-Foqra ta’ Altagracia de Orituco bil-għan li jiddedikaw ħajjithom għas-servizz tal-foqra.  Aktar tard, fil-25 ta' Marzu 1925, il-Kongregazzjoni kienet affiljata ma’ l-Ordni Karmelitan, u ġew imsejħin Terzjarji Karmelitani Regolari.  Illum huma magħrufin bħala s-Sorijiet Karmelitani tal-Venenzuela, jew is-Sorijiet Karmelitani ta’ Madre Candelaria.

Minkejja l-limiti ekonomiċi tal-Kongregazzjoni u n-nuqqas ta’ riżorsi, b’impenn u entużjażmu, Madre Candelaria wriet fiduċja kbira fil-Providenza ta’ Alla u mħabba bla qies għal dawk li l-aktar kienu fil-bżonn, u kienet ta' għajnuna kbira għall-midrubin tal-gwerer u l-morda l-aktar fqar.  Frott tal-ħidma tagħha twaqqfu diversi sptarijiet fil-pajjiż, u dan meta l-kura kienet skarsa u għalja.

Sforz l-imħabba kbira li kellha lejn Alla u d-dedikazzjoni ġeneruża tagħha lejn il-foqra, il-beata Karmelitana ġdida hija mudell ħaj ta’ virtù, fejn tidher fidi kbira f’Ġesù Kristu, għaqda mal-Knisja u mħabba lejha, u mħabba qawwija lejn il-foqra.