Valletta, Santwarju
tal-Madonna tal-Karmnu

Hu maħsub li l-pittur tal-kwadru tal-Madonna tal-Karmnu kien Sqalli minħabba li fil-pittura oriġinali kienu jidhru Sant’ Agata u Santa Luċija, patruni ta’ Katanja u Sirakuza. Ma hux magħruf meta tpitter. Xi dokumenti juru li kien diġà għand il-Karmelitani meta bnew il-knisja fl-1570. Il-kwadru oriġinali kien akbar milli hu llum, iżda lejn tmiem is-seklu 19 ġie mċekken u fil-proċess inqatgħet barra Santa Luċija. Illum il-kwadru juri lill-Madonna bil-qiegħda fuq il-qamar, b’Ġesù tarbija għeri fi ħdanha, żewġ anġli jinkurunawha u għadd ta’ erwieħ taħtha. Fuq naħa tal-Madonna jidher San Xmun Stock jirċievi l-labtu filwaqt li fuq in-naħa l-oħra tidher Sant’Agata. L-inkurunazzjoni tal-kwadru saret fil-15 ta’ Lulju 1881. (Ara)

Mġarr, Knisja ta' Sant'Antnin

Il-Patrijiet Franġiskani Minuri fetħu l-kunvent tagħhom fl-Imġarr, Għawdex, fl-1899. Wara li tlesta l-bini tal-knisja, kienet iddedikata lil Sant'Antnin f’Jannar 1905. Fi żmien sentejn il-knisja kienet diġa armata b’kollox. Fost l-oħrajn insibu artal iddedikat lill-Madonna tal-Karmnu. Il-kwadru, xogħol il-pittur Fortunato Venuti, alliev ta' Gagliardi, qam ħmistax-il lira li tħallsu mill-arġentier Carmelo Testa, mill-belt Valletta. L-artal ta' l-irħam inġieb mill-knisja ta' Santa Marija ta' Ġesù tal-belt fejn qabel kien l-artal ta' Sant'Antnin. Ir-restawrar u t-tqegħid f'postu ġew jiswew għaxar liri, li tħallsu mill-ġbir li għamel patri Benjamin Galea.

Mosta, Knisja Arċipretali

Xogħol sabieħ ieħor tal-pittur Ġużeppi Calì (1846-1930). Matul is-sena dan il-kwadru jkun fis-sagristija imma matul l-Erbgħat tal-Madonna tal-Karmnu (is-seba’ Erbgħat fuq l-Għid) jiġi armat fil-knisja fuq l-artal tar-rużarju.

Fgura, Knisja Parrokkjali

Il-kwadru titulari sar mill-pittur Rafel Bonnici Calì u moghti lill-knisja minn omm l-istess pittur. In-naħa t’isfel tal-kwadru tidher il-Fgura fil-bidu tagħha, li l-pittur ried ipoggiha sa minn tfulitha taħt il-ħarsien tal-Madonna tal-Karmnu.

Ħamet (Xewkija),
Knisja tal-Karmnu

Il-kwadru titulari tal-kappella sar mill-pittur Tomaso Madiona fl-1837 u kien miġjub mill-Kapitlu tal-Kattidral f'purċissjoni solenni mill-knisja tax-Xewkija fit-22 ta' Lulju 1838. Juri l-Verġni Marija u l-Bambin bil-labtu tal-Karmnu f’idejhom filwaqt li huma mdawrin minn sħaba ta’ anġli. Il-kwadru (bħal dak tal-Fgura) jpoġġi l-inħawi ta’ Ħamet taħt il-ħarsien tal-Madonna, u jurina kif kienet il-kappella oriġinali.

Siġġiewi, Knisja Parrokkjali

Il-kwadru tal-Madonna tal-Karmnu huwa xogħol il-pittur Ġużeppi Calì (1846-1930).

Ħamrun, Knisja Parrokkjali San Gejtanu

Dan il-kwadru, xogħol il-pittur Ġużeppi Calì (1846-1930), huwa oriġinali fil-preżentazzjoni tal-Madonna għax f'xena waħda kellu l-ħila jurina żewġ verita-jiet: il-Konċepiment Immakulat ta' Marija (bis-simboli tal-ġilju, il-qamar u s-serp) u l-imħabba tagħha lejna l-bnedmin fl-għoti tal-Labtu tal-Karmnu, żewġ veritajiet li nsibuhom minsuġin ma' l-istorja ta' l-Ordni Karmelitan.