IL-MADONNA TAL-KARMNU
minn Dr. Carmel Mallia
Fil-briju
ta’ dil-festa li tferraħna
f’dil-Belt
mibnija fuq sisien is-swar,
ej’ nilqgħu lill-Madonna tal-Karmelu
tallaba
quddiem Alla lejl u nhar.
F’dal-jum
li ilna nistennew ħerqana,
ħa’ jfewħu bħal inċens
qlub il-Maltin;
jissaħħaħ it-tifħir ‘l ommna
Marija
fil-laqgħa tagħna
fit-triqat Beltin.
Taħt sema mingħajr nikta
ta’ sajf ħlejju,
qegħdin kotrana
nieħdu f’id
xulxin
biex, taħt il-mant
li hu mifrux fuq rasna,
niġġeddu
bil-għerf bnin tal-qaddisin.
Mill-Palestina
għal Malta r-rħieb qaddisa
wasslulna
x-xbiha ta’ Elija l-kbir
biex nirkbu
l-karru ta’ nirien is-Sewwa
u ngħannu ħielsa bħal farfett
itir.
Titpaxxa ruħna qalb għelieqi u ħdura,
titpaxxa ruħna qalb irħula u
bliet,
għaliex hemm
il-Madonna tal-Karmelu,
għaliex hi
l-oħla fost l-aħjar għanjiet.
Il-Belt Valletta
23.11.95