Familja Karmelitana
L-Ewwel Ordni
PATRIJIET U FRAJIET
 F'dan il-grupp insibu l-membri rġiel,
li msejħin minn Alla,
jagħmlu l-professjoni
solenni tal-kastità konsagrata, tal-faqar u ta' l-ubbidjenza. Bis-saħħa
ta' din il-professjoni l-aħwa
kollha huma fundamentalment indaqs, bl-istess jeddijiet u dmirijiet. Minħabba l-ħtiġijiet pastorali ħafna minnhom jirċievu s-sagrament
ta’ l-Ordni Sagri (il-patrijiet). L-ewwel Karmelitani kienu frajiet,
jiġifieri ma rċevewx l-Ordni Sagri. Il-klerikalizzazzjoni ta' l-Ordni Karmelitan
seħħet fil-Kapitlu
Ġenerali ta' l-1291 minħabba diversi raġunijiet, fosthom: l-istil ta' ħajja ġdida fl-ibliet, il-ħidma pastorali, id-dħul ta' ħafna presbiteri fl-Ordni, kif
ukoll il-fatt li bosta żgħażagħ li ħaddnu l-ħajja karmelitana bdew jitolbu
li jirċievu l-ordinazzjoni, ma dan insemmu l-fatt taż-żieda
kontinwa ta' membri li riedu jkomplu l-istudji tagħhom. Minkejja dan il-proċess
ta' klerikalizzazjoni li, ta' min ifakkar li l-karizma ta' l-Ordni tibqa' "lajkali" u
mhux "klerikali" u għaldaqstant jistgħu jgħixuha dawk l-insara kollha li
jridu jagħmlu
parti mill-Familja Karmelitana. Intant, kemm il-patrijiet kif ukoll il-frajiet
jgħixu flimkien fuq l-istess Regula
u josservaw l-istess Kostituzzjonijiet.
Bħalissa,
f'dik
li hi tmexxija ġuridika, ir-reliġjuzi rġiel huma mqassma fi dsatax-il
Provinċja, tliet Kummissarjati, tliet Delegazzjonijiet, żewġ komunitajiet ta' eremiti u komunità affiljata. Dawn il-gruppi
huma kbar jew zgħar
skond in-numru tar-religjużi li għandhom. Hekk, ngħidu aħna,
filwaqt li l-Provinċja ta' Malta għandha
madwar 60 religjuż, dik Indonezjana għandha madwar 350 membru. Bejn
wieħed u ieħor l-Ordni jwassal għan-numru ta’ 2,100 religjuż fi
350 kunvent jew dar imxerrdin mal-ħames kontinenti.
Il-ħajja tar-reliġjużi
rġiel hija mżewqa bejn ħajja ta’ talb, ħajja komunitarja u ħajja ta’ servizz lill-Knisja skond
ma jitolbu l-post u ċ-ċirkustanzi li jgħixu fihom. Fost l-attivitajiet
pastorali l-aktar komuni nsibu s-santwarji marjani, il-parroċċi,
l-iskejjel u d-djar ta' l-irtiri. - AC
|