Familja Karmelitana

It-Tielet Ordni

TERZJARJI REGULARI (Sorijiet)

Sas-sekli sittax u sbatax il-ħajja reliġjuża femminili kienet tikkonsisti biss min-nisa li kienu jipprofessaw voti solenni u jgħixu f'monasteru bi klawsura stretta. Din il-firda totali bejn il-ħajja religjuża u l-ħidma ta' appostolat fis-socjetà tat bidu għal stat ġdid intermedju, jigifieri ta' bejn is-sorijiet tal-klawsura stretta u dawk li xtaqu jgħixu l-ħajja reliġjuża billi jagħtu huma wkoll is-sehem tagħhom fost il-poplu. Huma dawk li llum jissejħu Kongregazzjonijiet tar-reliġjużi nisa. Fi kliem ieħor huma s-sorijiet li mhumiex tal-klawsura stretta u huma reliġjuzi dedikati għall-ħajja ta' talb u appostolat. Jipprofessaw it-tliet voti tal-verġinità konsagrata, faqar u ubbidjenza, u jgħixu wkoll il-ħajja komunitarja.

L-Ordni Karmelitan għandu mseħbin miegħu erbgħatax-il Kongregaz-zjoni. Filwaqt li lkoll kemm huma jħaddnu l-istess ideal karmelitan ta’ kontemplazzjoni u jipprofessaw l-istess Regula Karmelitana, kull Kongregazzjoni għandha Kostituzzjonijiet għaliha u hija indipendenti fit-tmexxija tagħha. Ix-xogħol li jagħmlu dawn il-Kongregazzjonijiet tas-sorijiet jiddependi mill-iskop tat-twaqqif tagħhom. Xi wħud huma mogħtijin għat-tagħlim fl-iskejjel, oħrajn għall-kura tal-morda jew tax-xjuħ fl-isptarijiet, oħrajn għall-ħidma parrokkjali, filwaqt li oħrajn jingħataw għal xogħol missjunarju. Bejniethom ilaħħqu madwar 2,500 membru f'400 kunvent jew dar. Dawn il-Kongregazzjonijiet huma:
     Carmelite Sisters for the Aged and Infirm,
          imwaqqfa fl-Amerika fl-1929.
     Congregation of Our Lady of Mount Carmel,
          imwaqqfa fl-Amerika fl-1824.
     Corpus Christi Carmelites,
          imwaqqfa fi Trinidad fl-1908.
     Handmaids of Our Lady of Mount Carmel,
          imwaqqfa f'Zimbabwe fl-1959.
     Hermanas de la Virgen María del Monte Carmelo,
          imwaqqfa fi Spanja fl-1891.
     Hermanas Carmelitas de Madre Candelaria,
          imwaqqfa fil-Venezwela fl-1903.
     Hermanas Carmelitas del Sagrado Corazón de Jesús,
          imwaqqfa fi Spanja fl-1924.
     Hermits of Our Lady of Mount Carmel,
          imwaqqfa fl-Amerika fl-1998.
     Irmas Carmelitas da Divina Providencia,
          imwaqqfa fil-Brazil fl-1899.
     Irmas Missionarias Carmelitas de Jesús,
          imwaqqfa fil-Brazil fl-1938.
     Istituto di Nostra Signora del Carmelo,
          imwaqqfa fl-Italja fl-1854.
     Kongregasi Putri Karmel
          imwaqqfa fl-Indonezja fl-1982
     Suore Carmelitane delle Grazie,
          imwaqqfa fl-Italja fl-1727.
     Suore Carmelitane Missionarie di S. Teresa del Bambino Gesù,
          imwaqqfa fl-Italja fl-1925.

Minn dawn kollha, l-aħħar Kongregazzjoni biss għandha membri Maltin u djar f’Malta u fid-djoċesi ta' Għawdex. - AC