Il-Karmelu hija rivista li toħroġ kull tliet xhur mir-reliġjużi Karmelitani Maltin. Permezz ta’ din ir-rivista aħna nixtiequ naqsmu mal-poplu Malti u Għawdxi l-ispiritwalità Karmelitana b’mod popolari.
Ir-rivista titratta diversi temi attwali. Ngħidu aħna, matul is-sena 2004, it-tema tas-sena kienet l-istaġuni, u għalhekk kull ħarġa kienet tiffoka fuq kull wieħed mill-erba’ staġuni. Matul is-sena 2005 r-rivista dawwret il-ħarsa tagħha fuq l-erba’ fażijiet tal-ħajja, jiġifieri t-tfulija, ż-żgħożija, l-età adulta, u x-xjuħija.
Kull ħarġa ta’ Il-Karmelu ma tonqosx li tippreżenta elementi tal-ħajja Karmelitana. Fost dawn insibu paġna li tittratta l-vokazzjonijiet Karmelitani, u esperjenza ta’ l-istess ħajja, paġna mill-missjoni Karmelitana tal-Bolivja, aħbarijiet Karmelitani, u xi aspett ta’ l-istorja jew tal-ħajja Karmelitana. Barra minn hekk, insibu wkoll paġna dedikata lit-talb, u wkoll eżerċizzju prattiku tat-talb bil-Kelma ta’ Alla, dik li tissejjaħ il-Lectio Divina.
Nittamaw li b'dan is-sehem tagħna fil-qasam ta' l-istampa, dawk kollha li jaqraw Il-Karmelu jkomplu jikbru fil-ħajja umana u nisranija tagħhom.