3 ta’ Lulju

• Ċelebrazzjoni tal-festa tal-Madonna tal-Karmnu fil-parroċċa ta’ Fleur-de-Lys.

9 ta’ Lulju

• Tifkira tal-Beata Ġovanna Scopelli, Verġni
Twieldet f’Reggio Emilia fis-sena 1428. Saret soru Karmelitana u għall-ewwel għexet f’darha, u mbagħad fil-monasteru mwaqqaf minnha stess fil-belt fejn twieldet. Fil-monasteru kellha l-uffiċċju ta’ superjura u kienet magħrufa għad-devozzjoni li kellha lejn il-Verġni Marija. Mietet fl-1491.

10 ta’ Lulju

• Ċelebrazzjoni tal-festa tal-Madonna tal-Karmnu fil-parroċċa tal-Fgura.

13 ta’ Lulju

• Tifkira ta’ Santa Tereża ta’ Ġesù ta’ Los Andes, Verġni
Twieldet fit-13 ta’ Lulju 1900 f’Santiago fiċ-Ċili’ mill-familja Fernandez Solar. Minn ċkunitha kienet imsaħħra minn Kristu. Fis-7 ta’ Mejju 1991 daħlet mas-Sorijiet Karmelitani Tereżjani ta’ Los Andes, fejn tawha l-isem ta’ Tereża ta’ Ġesù. Għexet bl-akbar ferħ fil-Mulej u sempliċità kbira tal-qalb. Minħabba marda bikrija, għamlet il-Professjoni Reliġjuża qabel iż-żmien fuq is-sodda tal-mewt, li ġrat fit-12 ta’ April 1920. Xempju għaż-żgħażagħ, hija l-ewwel Beata Ċilena u l-ewwel Beata tal-Karmelu fl-Amerika Latina.

16 ta’ Lulju

• Tifkira Solenni ta’ l-Imqaddsa Verġni Marija tal-Karmnu
Il-Kotba Mqaddsa jfaħħru s-sbuħija ta’ l-Għolja tal-Karmel, fejn il-Profeta Elija mar iħares is-safa tat-twemmin ta’ Israel f’Alla l-Ħaj. Hawn, ħdejn il-għajn li ħadet isimha minn dan il-Profeta, xi rħieb fi ħruġ is-seklu tnax waqqfu l-għamara tagħhom u bnew oratorju għall-qima ta’ Omm Alla, hekk li bdew jissejħu l-Aħwa ta’ l-Imqaddsa Marija ta’ l-Għolja tal-Karmel, u lilha għażlu bħala Titular u Patruna tagħhom. Għalhekk lilha żammew bħala Omm u Xempju biex igħixu l-ħajja kontemplattiva u biex iwasslu l-għana ta’ l-għaqda ma’ Alla lil ħuthom il-bnedmin. It-Tifkira Solenni, li ‘l hawn u ‘l hinn kienet diġà tiġi ċelebrata fis-seklu erbatax, bil-mod il-mod xterdet ma’ l-Ordni kollu bħala sinjal ta’ ħajr ta’ dawn l-Aħwa għall-benefiċċji bla għadd mogħtija mill-Imqaddsa Omm Alla lill-Familja Karmelitana.

• Ċelebrazzjoni Solenni tal-festa tal-Madonna tal-Karmnu fis-Santwarju Bażilka tal-belt Valletta.

• F’dan il-jum għaziz għall-Ordni Karmelitan, il-Provinċjal, P. Alexander Vella, O.Carm., iħeġġeġ lill-membri kollha tal-Familja Karmelitana biex ta’ l-anqas jieħdu sehem f’waħda mill-funzjonijiet li ser isiru fis-Santwarju tal-Madonna tal-Karmnu tal-Belt: 15 ta’ Lulju, fis-7.00 p.m. - Translazzjoni; 16 ta’ Lulju, fid-9.15 a.m. - Quddiesa tal-Festa bil-priedka mill-Kan. George Bezzina, Kappillan tal-Fontana, u fis-7.00 p.m. - Purċissjoni-pellegrinaġġ mat-toroq tal-Belt bil-vara tal-Madonna tal-Karmnu.
Id-devoti kollha tal-Madonna tal-Karmnu huma mħeġġa mhux biss biex jieħdu sehem f’dawn iċ-ċelebrazzjonijiet ta’ ferħ għall-Familja tagħna imma wkoll li fuq l-eżempju ta’ Marija jqaddsu dan il-jum b’xi opri ta’ karità lejn min jinsab għaddej minn mumenti diffiċli.

17 ta’ Lulju

• Tifkira tal-Beata Tereża ta’ S. Wistin u Sħaba, Verġni u Martri
Hekk kif ir-Rivoluzzjoni Franċiża bdiet tidher ixxaqleb għall-agħar, is-sittax-il Karmelitana Tereżjana tal-monasteru ta’ l-Inkarnazzjoni ta’ Compiegne offrew lilhom infushom bħala vittma ta’ sagrifiċċju lil Alla, biex iberrdu l-ġustizzja divina u jaqilgħu l-paċi għall-Knisja. Fl-24 ta’ Ġunju 1794 ġew maqbuda u mkaxkrin il-ħabs, fejn għaġġbu lill-oħrajn bil-ferħ ta’ l-ispirtu u t-telqa sħiħa tagħhom f’Alla, waqt li bdew iħeġġu lill-ħabsin kollha jimtlew bil-qawwa billi jemmnu fl-imħabba ta’ Alla. Ġew ikkundannati għall-mewt minħabba l-fedeltà sħiħa tagħhom lejn il-Knisja u lejn il-ħajja reliġjuza, kif ukoll minħabba d-devozzjoni kbira li kellhom lejn il-Qalb ta’ Ġesù u ta’ Marija. Fis-17 ta’ Lulju 1794, wara li ġeddu l-wegħdiet tal-Professjoni Reliġjuża f’idejn Tereża ta’ Santu Wistin, flimkien magħha ġew maqtula f’Pariġi waqt li bdew ikantaw innijiet lil Alla u lill-Madonna.

20 ta’ Lulju

• Solennità ta’ Sant’Elija Profeta, Missier l-Ordni u Protettur tal-Provinċja Karmelitana Maltija
Fil-Kotba Mqaddsa Elija l-Profeta jidher bħala l-bniedem ta’ Alla li dejjem qagħad quddiem il-Mulej u ssielet bl-akbar ħeġġa għall-qima ta’ Alla veru u waħdieni. Huwa ħares id-drittijiet ta’ Alla quddiem il-poplu kollu f’taqbida kbira fuq il-Għolja tal-Karmel; u fuq il-muntanja Horeb ingħata l-esperjenza intima ta’ Alla l-Ħaj. L-ewwel irhieb, li fis-seklu tnax ġeddu l-għamla ta’ ħajja reliġjuża f’ġieh il-Verġni Marija fuq il-Għolja tal-Karmel, imxew fuq it-tradizzjoni monastika billi ħarsu lejn dan il-Profeta kbir biex ifasslu ħajjithom fuq tiegħu, waqt li jagħtu qima speċjali lil Omm Alla.

• Illum, f’Saint Elias College, ir-reliġjużi Karmelitani ser jiltaqgħu għall-Assemblea Provinċjali Annwali biex jiċċelebraw flimkien il-25 sena mill-Professjoni ta’ P. Michael Farrugia, il-50 sena mill-Professjoni ta’ P. Mario Enriquez, P. Valerjan Mercieca u P. Karm Ferrante, u l-25 sena mill-Ordinazzjoni Saċerdotali ta’ P. Raymond Calleja, P. Joseph Saliba u P. Charles Mallia.
Fl-istess okkażjoni l-Provinċjal u membri oħra tal-Provinċja għandhom jagħtu xi rapporti dwar il-ħidma li saret matul is-sena li għaddiet. Dawn ikunu segwiti minn diskussjoni fi gruppi u laqgħa plenarja fejn jiġu kkomunikati l-ideat u x-xewqat tar-reliġjużi preżenti għas-sena li ġejja.
Inħeġġu lill-membri tal-Familja Karmelitana biex jitolbu għas-suċċess ta’ din il-laqgħa.

24 ta’ Lulju

• Tifkira tal-Beatu Ġwann Soreth, Saċerdot
Twieled f’Caen fin-Normandija fl-1394 u f’żgħożitu daħal fl-Ordni Karmelitan. F’Pariġi ħa l-lawrja ta’ Duttur fit-Teoloġija; laħaq Prefett ta’ l-istudji u mbagħad Provinċjal ta’ Franza. Fl-1451 intgħażel Pirjol Ġenerali ta’ l-Ordni Karmelitan, u hekk baqa’ sa mewtu li ġrat f’Angers fl-1471. Ħadem ħafna biex ixerred u jġedded l-osservanza reliġjuża, kiteb kummentarju mill-isbaħ fuq ir-Regula, ġedded u xandar il-Kostituzzjonijiet fl-1462; għen ħafna fit-twaqqif tas-Sorijiet Karmelitani u fit-tixrid tat-Terz Ordni.

• Ċelebrazzjoni tal-festa tal-Madonna tal-Karmnu fl-Imdina.

26 ta’ Lulju

• Tifkira ta’ Sant’Anna u S. Ġwakkin, ġenituri tal-Verġni Marija, Protetturi ta’ l-Ordni
Skond tradizzjoni antika sa mis-seklu 2, dawn kienu l-ismijiet tal-ġenituri tal-Verġni Marija. Sant’Anna fis-seklu 6 kienet ġa meqjuma fil-Lvant, u fis-seklu 10 l-kult tagħha xtered fil-Punuent ukoll, waqt li dak ta’ S. Ġakbu hu aktar riċenti. L-Ordni Karmelitan hu Ordni kollu kemm hu Marjan u mqiegħed taħt il-patroċinju tal-Verġni Marija. Għalhekk iqim ukoll lil Sant’Anna u San Ġwakkin bħala protetturi sekondarji tiegħu flimkien ma’ S. Ġużepp, li hu l-protettur principali, minħabba li huma lkoll qraba tal-Verġni Marija.

27 ta’ Lulju

• Tifkira tal-Beatu Titu Brandsma, Saċerdot u Martri
Twieled fir-raħal ta’ Bolsward fl-Olanda fl-1881. Daħal fl-Ordni Karmelitan, u fl-1905 ġie ordnat saċerdot. Wara li għallem liż-żgħażagħ ta’ art twelidu f’għadd ta’ skejjel, inħatar professur tal-filosofija u ta’ l-istorja tat-teoloġija mistika fl-Università Kattolika ta’ Nijmegen, li tagħa mbagħad laħaq ukoll Rettur Manifiku. Kien ħabrieki fil-ġurnaliżmu, hekk li fl-1935 l-Isqfijiet għażluh bħala Kunsillier għall-ġurnalisti kattoliċi ta’ l-Olanda. Dejjem imħejji biex igħin f’kollox u lil kulħadd, żamm ruħu fidil għat-tagħlim ta’ l-Evanġelju, l-aktar waqt l-okkupazzjoni nażista ta’ art twelidu. Tqabad kontra l-ideoloġija tan-nażi bit-tixrid ta’ l-istampa t-tajba, l-aktar biex iħares il-libertà ta’ l-iskejjel kattoliċi. Minħabba f’hekk ġie arrestat. Mibgħut f’ħabs wara ieħor, kull ħin kien ta’ faraġ u għajnuna lill-ħabsin sħabu, sakemm ħaduh lejn il-kamp ta’ konċentrament ta’ Dachau, fejn qatluh fis-26 ta’ Lulju 1942.

31 ta’ Lulju

• Ċelebrazzjoni tal-festa tal-Madonna tal-Karmnu fil-parroċċa tal-Balluta.

• Ċelebrazzjoni tal-festa ta’ Santa Venera fil-parroċċa ta’ Santa Venera.