PredikazzjoniTriduTIFKIRA SOLENNI TAL-MADONNA TAL-KARMNU (2)
L-EWWEL JUM Marija Patruna tal-Karmelu Nimmaġina li kulħadd jaf li l-isem ta’ l-Ordni Karmelitan u t-titlu tal-Madonna tal-Karmnu nibtu mill-għoljiet tal-Karmelu f’Israel. Kien sewwa sew f’dan il-post li lejn l-aħħar tas-seklu tnax, grupp ta’ eremiti li min-naħa tal-Punent marru pellegrinaġġ lejn l-Art Imqaddsa – l-Art li l-Mulej Ġesù għex fiha u saqqa b’demmu – u stabilixxew irwieħhom f’dawn l-għoljiet b’rabta ta’ tradizzjoni Biblika mal-Profeta Elija, li għammar fuq l-istess għoljiet u hemmhekk ukoll wera min hu l-veru Alla. Huma riedu jagħtu ħajjithom kollha lis-Sid ta’ l-Art li kienu qegħdin jgħammru fiha, il-Mulej Ġesù, li riedu b’qalbhom kollha jimxu warajh u jaqduh b’qalb safja u b’kuxjenza tajba (2 Kor 10,5; 1 Tim 1,5; Regula Karmelitana, 2). Ta’ bnedmin li kienu, dawn l-aħwa qaddisa ma setgħux jaslu għall-għan tagħhom waħidhom, għalhekk xtaqu kieku jkollhom mudell biex jimxu fuqu. Aħseb u ġib lil min jaħseb, u raw li m’hemmx mudell aqwa mill-persuna li għexet b’mod perfett il-ħajja ta’ dixxiplu, il-ħajja fejn wieħed jinxteħet f’riġlejn l-Imgħallem, jisma’ l-Kelma tiegħu u jħalliha tgħammar bil-kotra f’fommu u f’qalbu (Kol 3,17; Regula Karmelitana 19). Dawn l-aħwa-eremiti, raw fil-Verġni Marija, Omm il-Feddej, il-mudell perfett li fuqha jistgħu jwasslu ħajjithom, sakemm jaslu sal-perfezzjoni, sakemm isiru jixbhu lil Binha u lil Ħuhom, il-Mulej Ġesù. Meta l-ewlenin Karmelitani għażlu lill-Verġni Marija bħala l-mudell tagħhom, riedu jagħmlu xi ħaġa iżjed minn hekk. Kienu diġà taw ħajjithom lis-Sid u l-Patrun ta’ l-Art, il-Mulej Ġesù. F’din il-mixja tagħhom fuq l-art, riedu li ħajjithom tkun mogħtija wkoll lis-Sidt, lis-Sinjura li ħassew li kienu qegħdin jgħixu fl-art tagħha. Kienet is-sistema fewdali taż-żminijiet tan-nofs, dak li b’Malti mfarrak insejjħulu l-Medjuevu. Is-sid kien jagħti l-art lill-qaddej tiegħu, u l-qaddej ried ikun lest li jagħti l-ħlas tajjeb lis-sinjur tiegħu. Kien mistenni mill-qaddej li jġib rispett u mħabba lejn is-sid, u s-sid min-naħa tiegħu kien jintrabat li jħares u jagħti dak li hu meħtieġ għall-qaddej tiegħu. L-ewwel Karmelitani mxew fuq l-istess mudell. Għarfu lill-Verġni Marija bħala s-Sidt u s-Sinjura tal-post li kienu qegħdin jgħammru fih. Wegħduha mħabbithom u ntrabtu magħha li jgħixu bħalha u flimkien magħha. Hi, min-naħa tagħha, wiegħdet il-ħarsien u l-imħabba tagħha fuq dawn l-aħwa li hi ħaddnet magħha. Hekk sar patt bejn Marija u l-Karmelitani. Patt li ġie mġedded f’kull żmien ta’ l-istorja tal-Karmelu. U meta l-kliem m’huwiex biżżejjed biex jispjega l-imħabba – għax l-imħabba mhux la kemm wieħed jispjegaha – nużaw is-simboli u s-sinjali. Is-sinjal li l-Verġni Marija ħarset fil-passat, għada tħares fil-preżent, u tibqa’ fil-futur, huwa dak tal-Labtu Mqaddes, għax il-Verġni Marija, kif jitlob minnha l-patt li sar darba fuq il-Karmelu, ħarset, għada tħares u se tibqa’ tħares lil dawk fdati taħt il-ħarsien tagħha. * * * Meta l-patrijiet Karmelitani aktar minn mitt sena ilu ġew biex iwaqqfu l-kunvent tagħhom f’din il-bajja tal-Balluta, u fit-twaqqif tal-knisja, li aktar tard saret parroċċa, riedu b’xi mod jerġgħu jwettqu dan il-patt li kien sar fuq il-Karmelu. Riedu jagħmluh mill-ġdid f’dan il-post, fil-waqt li għoġobhom isieħbu magħhom lin-nies li kienu jgħixu u kellhom jgħixu f’dan il-post. Kif għamlu l-aħwa Karmelitani, l-parroċċa tal-Balluta għażlet lill-Verġni Marija biex tkun il-Patruna waħdanija tagħha. Dan ma sarx biex il-parroċċa tagħna jkollha Patruna għax hekk is-soltu jsir. L-għażla tal-Verġni Marija tal-Karmnu bħala Patruna ta’ din il-parroċċa jfisser li aħna kontinwament qegħdin nagħrfu l-għajnuna u l-ħarsien tal-Verġni Marija fil-ħajja tagħna, imma fl-istess ħin, irridu kontinwament nagħrfu dak li hu mistenni minna lkoll. Jeħtieġ li l-ħajja tagħna tkun tixraq tassew lil nies li nxteħtu darba għal dejjem taħt il-ħarsien tal-Verġni Marija. Il-ħajja tagħna, trid tkun tidher minn ġewwa u minn barra li aħna qegħdin ngħixu bħala dixxipli ta’ l-Imgħallem, kif tixtieq minna l-Verġni Marija. Aħna u niċċelebraw il-preparazzjoni li se twassalna għall-festa tal-Madonna fil-parroċċa tagħna, ejjew induru lejn il-Verġni Marija u nroddulha ħajr talli bħala Patruna tagħna dejjem uriet fedeltà lejn il-patt ta’ mħabba li jeżisti bejnha u bejnna. Ejjew induru lejha u nitolbuha tkompli tgħinna, tqawwilna qlubna u tagħmlilna kuraġġ biex min-naħa tagħna qatt ma nerġgħu lura mit-triq li qiegħda turina hi, dik it-triq li twassalna għand Binha Ġesù. Induru lejha, u ngħaqqdu leħinna u qlubna ma’ dawk ta’ bosta Karmelitani ta’ l-imgħoddi u tal-preżent, u b’talba antika li ħarġet mill-qalb u l-pinna ta’ Arnoldu Bostio, nitolbuha: IT-TIENI JUM Marija Omm il-Karmelu Awtur Karmelitan antik jgħid li l-ordnijiet reliġjużi kollha kemm huma għandhom missjoni partikulari x’jaqdu fi ħdan il-Knisja. Meta niġu għall-għan ta’ l-Ordni Karmelitan, l-istess awtur jgħid li l-Karmelu huwa preżenti fid-dinja biex ikompli fid-dinja tagħna tal-bieraħ, tal-lum u ta’ għada dik l-imħabba ta’ Iben li Ġesù kien jagħti lil ommu, l-Verġni Marija. Għalhekk, kull Karmelitan, għandu jħoss fuqu d-dmir li jħobb lill-Verġni Marija – ommu – b’dik l-istess imħabba li biha kien iħobbha Binha Ġesù. Il-figura tal-mara-omm hija figura importanti ħafna fil-ħajja tal-bniedem. Hija l-figura li timxi magħna – u aħna magħha – mill-ewwel waqtiet ta’ l-eżistenza tagħna u nibqgħu nġorruha ħajjitna kollha. Min hija l-omm jekk mhux dik li tiġi tiġri lejna ma’ kull għajta u bikja tagħna? Min hija l-omm jekk mhux dik li terfagħna fuq dirgħajha kull darba li rridu l-għajnuna u l-ħarsien tagħha? Jekk l-omm naturali tagħna ta’ din id-dinja tagħmel kull ma hu meħtieġ għall-ħajja tagħna, l-istess tagħmel l-Omm tagħna l-Verġni Marija. Ma’ kull tnehida tagħna, ma’ kull waqgħa u bikja tagħna, naraw lil din l-Omm l-aktar ħelwa tnewwlilna jdejha. Il-Karmelu jħares lejn il-Verġni Marija u jsellmilha bħala l-Omm l-aktar ħelwa. Imma dan mhux biss għax hija Omm Alla, kif iddikkjaraha solennement il-Konċilju ta’ Efesu, imma għax hija wkoll Omm dawk kollha li jemmnu, Omm il-Knisja, kif għarafha mill-ġdid u ddikkjaraha l-Konċilju Vatikan it-tieni. Mara qawwija u mara tat-tama, l-Verġni Marija baqgħet sħiħa fil-fidi tagħha. Għalhekk, is-sejħa tagħha kienet waħda li twettaq u tqawwi l-qlub ta’ dawk li ma kinux daqshekk sħaħ u qawwijin. Fiċ-ċenaklu, wara l-Qawmien u t-Tlugħ fis-Sema tal-Mulej, lill-Verġni Marija narawha miġbura flimkien ma’ l-Appostli u d-dixxipli tistenna l-miġja ta’ l-Ispirtu s-Santu. Il-preżenza tagħha f’dan il-post imqaddes kienet waħda ta’ inkoraġġament lil dawk kollha miġbura fit-talb (Atti 1,14). Il-Karmelitani, sa mill-bidu tagħhom, dejjem raw lilhom infushom bħala komunità miġbura madwar il-Verġni Marija. F’kull waqt ta’ l-istorja, kull Karmelitan dejjem ħass li huwa tassew bin Marija, imma fl-istess ħin, dejjem ħass li Marija hija Ommu. Kull Karmelitan, iħoss li l-Verġni Marija hija dik li fiż-żmien tal-ferħ u tan-niket, jista’ jintefa’ fi ħdanha, u għax hija Ommu, tħobbu u tieħu ħsiebu. Il-Verġni Marija hija tassew preżenti kull fejn jgħammru l-Karmelitani, imma m’hijiex preżenti biss fix-xbihat. Hija preżenti fl-istorja ta’ kull wieħed u waħda minna. Hija preżenti f’dak kollu li ngħaddu minnu fil-ħajja tagħna, u għax hija l-Omm l-aktar ħelwa tal-Karmelu, hija kontinwament tara x’jonqosna fil-ħajja tagħna u turina dejjem aktar li rridu nagħżlu s-sehem it-tajjeb (Lq 10,42). * * * Żgur li l-membri kollha ta’ din il-parroċċa tal-Balluta, mhux darba u tnejn ħassejna l-preżenza materna ta’ din l-Omm l-aktar ħelwa. Min jaf kemm drabi, tfal, żgħażagħ, adulti u anzjani rsaqna lejn il-Verġni Marija biex nitolbuha tħarisna bħala l-Omm tagħna lkoll! Min jaf kemm drabi ħarisna lejn ix-xbieha għażiża tagħha meqjuma f’din il-knisja u ressaqna quddiemha t-tnehid tagħna ta’ wlied! Min jaf kemm-il darba d-dmugħ ġelben minn għajnejna u tlabniha b’ħerqa! U l-Verġni Marija, ta’ Omm li hi, qatt ma dawwret il-ħarsa tagħha minn fuqna. Qatt ma rsaqna quddiemha u saddet widnejha għat-tnehid tagħna. Qatt ma ridna nistkennu fi ħdanha u hi għalqet qalbha għalina. Anzi, kull darba li nagħtuha jdejna, hi tagħtina tagħha. Kull darba li nressqu n-niket tagħna quddiemha, hi tara kif tagħmel biex dan in-niket iddawwarulna f’ferħ. Kull darba li nkunu rridu xi ħaġa, hija tagħtina iżjed milli nitolbuha, għax kif omm taf tagħti ħwejjeġ tajba lil uliedha (Lq 11,13), l-Verġni Marija tagħtina kontinwament l-aktar ħaġa għażiża li għandha. Il-Verġni Marija tagħtina kontinwament lil Ġesù. Il-festa li ta’ kull sena niċċelebraw lill-Patruna tagħna, hija okkażjoni li fiha nduru lejn il-Verġni Marija ftit aktar mis-soltu, u forsi aktar mill-jiem l-oħrajn tas-sena, nħossu aktar il-preżenza tagħha fostna, nħossu l-imħabba tagħha ta’ Omm. Imma ma rridux ninsew li din l-Omm l-aktar ħelwa qiegħda kontinwament tgħix magħna, tieħu ħsiebna u tħarisna. Ejjew nieħdu l-okkażjoni tal-festa biex inġeddu l-impenn tagħna ta’ vera wlied lejn din l-Omm li hija dejjem magħna. Ejjew induru lejha u nitolbuha sabiex kull darba li ninsew li hija Ommna, tfakkarna hi. Oħtna ċ-ċkejkna fil-Karmelu Tereża tal-Bambin Ġesù, ħasset tul ħajjitha kollha l-preżenza materna tal-Verġni Marija. Ma’ din iċ-ċkejkna oħtna, nduru lejn il-Verġni Marija permezz tal-kliem meħud mill-aħħar poeżija li kitbet: IT-TIELET JUM Marija Oħt tal-Karmelitani Il-ħajja tal-Karmelitan hija mixja li twassalna xi mkien. Ħafna drabi, fit-tradizzjoni Karmelitana, din il-mixja ġiet imxebbha mat-telgħa ta’ l-għolja, li malli naslu fil-quċċata tagħha, hemmhekk niltaqgħu mal-Mulej tagħna Ġesù u ninbidlu fih. Ilkoll kemm aħna, għalhekk, ninsabu mexjin u telgħin. Imma aħna t-triq ma nafuhiex bl-amment. Jekk insuqu l-karozza, inħarsu lejn is-sinjali tat-traffiku. Jekk inkunu mexjin, irridu nużaw il-mappa. Jekk nitilgħu xi għolja jew muntanja, nsegwu s-sinjali. F’din it-telgħa ta’ l-għolja, għandna bżonn l-għajnuna ta’ xi ħadd li jurina t-triq, xi ħadd li jmexxina. Imma m’għandniex għax naqtgħu qalbna. F’din it-telgħa iebsa ta’ l-Għolja tal-Karmelu, m’aħniex waħidna; il-Verġni Marija, Oħtna fit-triq tal-fidi, tissieħeb magħna u tagħmlilna l-qalb, bħala Omm u Għalliema tagħna (Ratio Institutionis Vitae Carmelitanae, par.2). Minn dan joħroġ ċar li hemm ċerta familjarità intima bejn il-Karmelitan u l-Verġni Marija. Huwa għalhekk li l-Karmelitani mhux biss isejjħu lill-Verġni Marija bħala Omm, imma wkoll bħala Oħt. Għax hija sewwa sew waħda minna. Tgħix magħna fis-sabiħ u fl-ikrah tal-ħajja. Il-ħajja tan-nisrani, ta’ kif jgħix in-nisrani, tafha diġà, għax għexitha qabilna. Fuq kollox, kienet hi l-ewwel waħda li mxiet b’mod perfett il-mixja tagħha wara l-Mulej Ġesù. Kienet hi l-persuna li għax imxiet qabilna fit-triq tal-fidi, din it-triq tafha sew. Il-Karmelitani raw fiha l-persuna li m’hijiex se tidħaq bihom u tiġri quddiemhom għax it-triq tafha aħjar, jew inkella se tħallihom jaqbdu xi mogħdija b’oħra hekk li jistgħu jintilfu. Raw fiha dak is-sinjal li se jwassalhom u se jwassalna żgur f’mergħat kollhom ħdura (Salm 23,2). Wara kollox, dik kienet is-sejħa ta’ Marija, li mhux biss tkun Omm Alla, imma waqt li tagħti lil Ġesù lid-dinja, turihulna bħala t-Triq, is-Sewwa u l-Ħajja (Ġw 14,6). Is-sejħa ta’ Marija hija dik li twassalna għand Binha Ġesù. B’dan il-mod, il-Verġni Marija turina li m’hijiex waħda li kollox idur magħha, tkun hi ċ-ċentru ta’ l-attenzjoni. Imma minflok, il-Verġni Marija turina kontinwament li hi tinsab preżenti mhux għaliha nnifisha, imma aktar minn hekk, għal Binha Ġesù. Il-Mulej Ġesù kien u hu l-għan tal-Verġni Marija, u għalhekk, issa kontinwament qiegħda turih lilna. Turina lil Ġesù biex aħna wkoll ngħaddu mill-istess esperjenza tagħha, dik li nħallu lil Kristu jissawwar fina (Gal 4,19) biex aħna wkoll, bil-ħajja tagħna nkunu nistgħu ngħadduh lill-oħrajn, inwasslu l-preżenza tiegħu ta’ mħabba f’dinja li hija nieqsa mill-imħabba. Imma jidhirli li nkunu qegħdin nonqsu jekk aħna li ninsabu f’din il-bajja tal-Balluta, nsejjħu biss lill-Verġni Marija bħala Oħtna l-kbira, u Oħtna fit-triq tal-fidi. Xieraq li nsellmulha bħala l-Kewkba tal-Baħar. Il-kewkba tal-baħar kienet tintuża mill-baħħara biex tmexxihom hi sakemm jaslu fil-port li jridu. Għalina, aħna li ninsabu għaddejjin u nbaħħru fil-mewġ tal-ħajja, l-Kewkba tal-Baħar hi l-Verġni Marija, għax jekk hija dik li turina t-triq fit-telgħa ta’ l-Għolja, hija wkoll il-Kewkba li twassalna fil-port tas-salvazzjoni, Kristu l-Mulej. Il-Verġni Marija hija dik il-kewkba li d-dawl li tarmi m’huwiex tagħha, imma huwa rifless minn xemx akbar. Il-Verġni Marija tirrifletti d-dawl li tarmi x-xemx vera, l-Mulej Alla tagħna. * * * F’din il-parroċċa, misjuba sewwa sew fil-bajja tal-Balluta, l-Verġni Marija hija verament il-kewkba tleqq u tilma fid-dalma tal-lejl. Il-Verġni Marija, għal din il-parroċċa, jeħtieġ li tkun dak is-sinjal li jidher, sinjal jixgħel fid-dlam. Il-Verġni Marija hija dik li tħares lill-membri ta’ din il-parroċċa fis-sigħat mudlama tal-ħajja tagħhom, u toffrilhom li jaraw id-dawl veru. Toffrilhom lil Binha Ġesù. Il-parroċċa tal-Balluta, jekk l-għan tagħha huwa verament dak li kulħadd jasal għand il-Mulej Ġesù, jeħtieġ li kontinwament niftakru li l-Verġni Marija, Patruna tagħna, qiegħda timxi magħna f’din l-istess triq li mexjin fiha aħna. Irridu niftakru l-ħin kollu li ma nistgħux naqbdu t-triq u nitilqu għal rasna, nkella se nintilfu żgur. Inkunu ċerti minn din il-preżenza ħelwa ta’ Oħtna Marija u nħalluha tmexxina hi u turina t-triq hi. Hekk, bħalha u flimkien magħha, nkunu nistgħu naslu bħala aħwa għand dak li qiegħed isejjħilna biex ningħaqdu miegħu. Ejjew induru lejn il-Verġni Marija, u kif hi qiegħda turina lil Ġesù, nitolbuha l-għajnuna u l-ħarsien tagħha biex inkunu nistgħu nagħrfuh tassew bħala dak li rridu nimxu warajh, u dak li hu verament l-għan waħdieni tal-ħajja tagħna, hekk li mingħajru xejn ma jkun jiswa. Induru lejha, u b’talba ħierġa mill-qalb insellmulha: Ommna għaqlija Omm l-aktar ħelwa, Inti għalina |