NITOLBU

BIR-REGULA KARMELITANA (2)

F’din il-ħarġa inkomplu l-lectio divina fuq ir-Regula Karmelitana, u din id-darba sejrin nirriflettu fuq il-preżenza ta’ Kristu Bieb u Rgħaj tal-merħla fil-komunità Karmelitana. Din il-preżenza ta’ Kristu tidher fil-persuna tal-pirjol. Għaldaqstant insibu silta qasira mill-Evanġelju skond San ġwann fuq ġesù ir-Ragħaj it-Tajjeb u s-siltiet tar-Regula li jitkellmu fuq ir-rwol tal-Pirjol fil-komunità Karmelitana u r-relazzjoni tiegħu mal-membri ta’ din il-komunità ta’ persuni li ddedikaw ħajjithom għall-mixja wara Kristu.

1. LECTIO

1.1 Nitolbu lill-Ispirtu s-Santu idawwalna ħalli nisimgħu u nilqgħu l-kelma ta’ Alla:

Ejja Spirtu s-Santu
Imla’ qlub il-fidili tiegħek
Kebbes fihom in-nar ta’ mħabbtek
Ibgħat in-nifs tiegħek u jinħolqu
U Inti ġġedded il-wiċċ ta’ l-art.

Nitolbu: O Alla li sawwabt fuqna l-Ispirtu Qaddis tiegħek;
Agħtina li bil-qawwa ta’ l-istess Spirtu s-Santu
infittxu dejjem lil Wiċċek
waqt li nimxu wara Kristu
b’qalb safja u kuxjenza nadifa.

1.2 Qari tat-test:

Qari mill-Evanġelju skond San Ġwann (10, 7.9.11.27-30)

10 ⁷Tassew tassew ngħidilkom li l-bieb tan-nagħaġ huwa jien. ⁹Jiena hu l-bieb; jekk xi ħadd jidħol ġewwa permezz tiegħi, isalva, u jidħol u joħroġ u jsib fejn jirgħa. ¹¹Jiena r-ragħaj it-tajjeb. Ir-ragħaj it-tajjeb jagħti ħajtu għan-nagħaġ tiegħu. ²⁷In-nagħaġ tiegħi jisimgħu leħni, u jiena nagħrafhom, u huma jimxu warajja. ²⁸U jien nagħtihom il-ħajja ta’ dejjem; u huma ma jintilfu qatt, u minn idejja ma jaħtafhomli ħadd. ²⁹Missieri, li tahomli, hu akbar minn kulħadd, u ħadd ma jista’ jaħtafhom minn id il-Missier. ³⁰Jien u l-Missier aħna ħaġa waħda.

Qari mir-Regula ta’ l-Aħwa ta’ l-Imqaddsa Verġni Marija ta’ l-Għolja tal-Karmelu:

[4] Nordnaw l-ewwelnett li jkollkom wieħed minnkom bħala Pirjol li jintagħżel għal dan l-uffiċċju bil-kunsens ta’ kulħadd jew tal-parti l-aktar għaqlija; lilu, kull wieħed mill-oħrajn iwiegħed ubbidjenza u jfittex iħares il-wegħda bis-sewwa ta’ l-għemil flimkien mas-safa u ċ-ċaħda ta’ kulma għandu.
[9] Il-kamra tal-Pirjol tkun ħdejn id-daħla tal-post fejn toqogħdu (ġw 10, 9), sabiex huwa jkun l-ewwel li jilqa’ lil min jiġi f’dan il-post u mbagħad dak kollu li għandu jsir jitwettaq skond il-fehma u r-rieda tiegħu.
[22] U inti, ħija B(rokard), u kull min warajk jinħatar Pirjol, żommu dejjem f’moħħkom u wettqu bl-għemil dak li l-Mulej jgħid fl-Evanġelju: “Kull min irid ikun il-kbir fostkom, għandu jkun il-qaddej tagħkom u kull min irid ikun l-ewwel fostkom, ikun l-ilsir ta’ kulħadd.” (Mt 20, 26-27).
[23] Intom ukoll, l-aħwa l-oħra weġġħu bl-umiltà lill-Pirjoli tagħkom waqt li ġġibu quddiemkom aktar milli lilu, lil Kristu li qegħdu fuqkom u jgħid lill-Kapijiet tal-Knisja: “Min jisma minnkom, jisma’ minni; min imaqdar lilkom, imaqdar lili” (Lq 10, 16), sabiex ma jsirx ħaqq minnkom għax inqasstuhom imma talli obdejtu jkun jistħoqqilkom il-ħlas tal-ħajja ta’ dejjem.

2. MEDITATIO

2.1 Riflessjoni qasira:

Ġesù huwa r-Ragħaj tal-merħla qaddisa ta’ Alla, il-komunità nisranija. Huwa hu li jmexxi lilna l-bnedmin lejn is-saltna tas-sema, fi triqtna lejn Alla l-Missier. Huwa jsitqarr li hu l-bieb u li hu bħala ragħaj tajjeb jagħraf u jaf lin-nagħaġ tiegħu li min-naħa tagħhom jisimgħu leħnu u jgħarfuh. Kristu jkompli jmexxi u jaqdi l-uffiċċju tiegħu ta’ Ragħaj, permezz ta’ dawk li jqiegħed f’ismu fuq il-merħla tiegħu. Lil Pietru fl-Evanġelju jgħidlu: Irgħa l-ħrief u ngħaġ tiegħi (ġw 21, 15-17). Li wieħed jirgħa n-ngħaġ u l-ħrief ta’ Kristu hija turija, sinjal ta’ l-imħabba li dak li jkun għandu għal Kristu (ġw 21, 15). Huwa għall-imħabba ta’ Kristu li dawn jilqgħu dan l-uffiċċju, biex bħalu huma jmexxi billi jaqdu bl-imħabba u jsiru qaddejja ta’ kulħadd (Mt 20, 26-27).

Il-pirjol fil-komunità Karmelitana, huwa s-sinjal tal-preżenza ta’ Kristu f’din l-istess komunità. Ir-rwol tiegħu, kif tifhmu r-Regula, huwa aktar ta’ mexxej ta’ l-erwieħ milli ta’ superjur li jikkmanda u jiddeċiedi. Għalkemm huwa wkoll għandu dan id-dmir li jieħu deċiżjonijiet meta hu meħtieġ sabiex dak kollu li għandu jsir jitwettaq skond il-fehma u r-rieda tiegħu (Reg. 9). Huwa jmexxi l-komunità Karmelitana fl-esperjeza tagħha ta’ Alla, billi jkun għad-disponibilità ta’ kulħadd fil-ħtiġijiet materjali u spiritwali. Fil-qadi ta’ dmiru mela huwa jwettaq bl-għemil dak li l-Mulej jgħid fl-Evanġelju: “Kull min irid ikun il-kbir fostkom, għandu jkun il-qaddej tagħkom u kull min irid ikun l-ewwel fostkom, ikun l-ilsir ta’ kulħadd.” (Reg. 22). Huwa joqgħod fid-daħla tal-post, fil-bieb, biex jilqa’ lil kull min jidħol fil-Karmelu (Reg. 9), dan il-ġnien tal-Mulej, il-maqjel spiritwali –biex nużaw il-metafora biblika- li fih in-nagħaġ jirgħu, isibu l-ħajja u s-salvazzjoni (ġw 10, 9).

Għaldaqstant, kull membru tal-komunità Karmelitana irid jara fil-pirjol lil Kristu: Intom ukoll, l-aħwa l-oħra weġġħu bl-umiltà lill-Pirjoli tagħkom waqt li ġġibu quddiemkom aktar milli lilu, lil Kristu li qegħdu fuqkom u jgħid lill-Kapijiet tal-Knisja: “Min jisma’ minnkom, jisma’ minni; min imaqdar lilkom, imaqdar lili” sabiex ma jsirx ħaqq minnkom għax inqasstuhom imma talli obdejtu jkun jistħoqqilkom il-ħlas tal-ħajja ta’ dejjem (Reg. 23). Mela l-preżenza u l-leħen tal-prijol hija l-preżenza u l-leħen ta’ Kristu li min jisimgħu u jimxu fuq dak li jgħid hu bil-kelma u bl-eżempju jieħu l-ħlas tal-ħajja ta’ dejjem u ma jintilef qatt (ġw 10, 27-28).

2.2 Mistoqsijiet għar-riflessjoni personali:

• Kemm int bniedem mehdi fis-smigħ ta’ dak li jrid jgħidlek Alla?
• Kemm qiegħed tħalli lilek innifsek tiġi ttrasformat u mmexxi mil-leħen ta’ Kristu fil-mixja tal-ħajja? Tagħraf il-ħtieġa ta’ gwida li timxi miegħek fil-mixja tiegħek wara Kristu?
• Il-mixi tiegħek wara Kristu huwa kontinwu? Anke meta quddiemek jitfaċċaw vuċijiet oħra li jippruvaw jiġbduk warajhom?
• Aktar ma nagħrfu lil Ġesù, aktar nindunaw li joħloq fina ċertu sigurta. Tħossha din is-sigurta f’ħajtek, ukoll meta tħossok mhedded mill-ħażen u mid-diffikultajiet?

3. ORATIO

3.1 Talb personali fis-skiet tal-qalb

3.2 Salm 23 (22)

Il-Mulej hu r-Ragħaj tiegħi,
xejn ma jonqosni;
f’mergħat kollhom ħdura jqegħdni.
ħdejn l-ilma, fejn nistrieħ, jeħodni;
hemm hu jrejjaqni.
Imexxini fit-triq tas-sewwa
minħabba l-isem tiegħu.

Imqar jekk nimxi f’wied mudlam,
ma nibżax mill-ħsara, għax inti miegħi.
Il-ħatar u l-għasluġ tiegħek,
huma jwensuni.

Int tħejji mejda għalija
quddiem l-egħdewwa tiegħi.
Biż-żejt tidlikli rasi,
 u l-kalċi tiegħi tfawwarli.

Miegħi, iva, jimxu t-tjieba u l-ħniena
il-jiem kollha ta’ ħajti.
U ngħammar f’dar il-Mulej
sakemm indum ħaj!

4. CONTEMPLATIO

"L-aħjar ħin biex titħaddet ma’ Alla, tismà l-leħen ħelu tiegħu u titgħallem taqdih skond ir-rieda tiegħu, huwa meta jkollok fik lil dan il-mistieden divin. Għaldaqstant oqgħod attent għal-leħen divin tiegħu, għax min jitgħallem mingħand Ġesù m’għandux bżonn ta’ kotba oħra jew ta’ tagħlim ieħor." Santa Maria Maddalena de’ Pazzi (1566-1607)

© Provinċja Karmelitana Sant'Elija, Malta.
Webmaster | Homepage